اسلام آباد۔ 01 دسمبر (اے پی پی) سول سوسائٹی کولیشن موسمیاتی بدلی انسٹی ٹیوٹ آف ریجنل اسٹڈیز، فرانسیسی سفارت خانہ و ایس ڈی پی آئی نا کمک اٹ گلاسکو کلائیمیٹ چینج کانفرنس (سی اوپی۔20) نا اڈتننگ آن پد پین گپ و تران کن شرہ نا بست وبند اس کرے۔ داوخت آ وزیراعظم نا خصوصی کمکار موسمیاتی بدلی ملک امین اسلم کلیدی تران اس کرسا گلاسکو کلائیمیٹ پپیکٹ 2021 نا سرسہبی و خامی تے تالان کرے۔ چارشنبے نادے آ جاری بیان نا رداٹ وزیراعظم نا خصوصی کمکار موسمیاتی بدلی بشخ ہلوک آتے مقرر کروک ہدف آتا تازہ انگا حالیت آتیان معلومدار کرے۔ اوپاکستان نا شجرکاری مہم و موسمیاتی مصارف اٹ مالیات نا گچین کاریم اٹ اتنگ آ جہانی برادری نا پذیرائیءِ سرجمی اٹ مون آ تخا۔ اٹلی نا سفیر فیریرس اینڈ ریاس آب و ہوانا بدلی تا توننگ کن گپ وتران ءِ برجاتخنگ و امنائی سلاہ ودی کننگ نا گرج انا عزم انا درشانی ءِ کرے۔ شرہ نا ماڈریٹر عائشہ خان (سی ایس سی سی سی ) پوسکن آ سمت متعین کروک آ سوج آتے تالان کرے۔ فرانس نا سفارت خانہ غان من ویلے ویس پارے کہ موسمیاتی بدلی تا بارواٹ مذاکرات پیچیدہ ویل آتے ایسر کیک و ہنداخاطرآن دا بابت مروک آ پیش رفت ءِ سرسہبی نا وڑاٹ بایدے ہُننگے۔ قومی اسمبلی نا باسک رومینہ خورشید پارلیمنٹ اٹ موسمیاتی بدلی آ شرہ ٹی ترندی اتنگ نا گرج آ زور شاغا۔ جہانی بینک انا کنٹری ڈائریکٹر موسمیاتی بدلی تا توننگ نا عزم کرے و باور کرفے کہ بینک چاگڑدی نظام ءِ سوگو کننگ، تہو انا آب ءِ گچین کننگ و ہائیڈرو سولیڈیریٹی کن کمک فراوان کیک۔ ایس ڈی پی آئی آن ڈاکٹر عابد سلہری خور انا رکھ ءِ ملک انا اولیت گوندا۔ انسٹی ٹیوٹ آف ریجنل سٹڈیز نا سروک سفیر ندیم ریاض تینا بنائی تران اٹی داویل آتا خلاصہ اس پیش کرے ہرا سی اوپی 26 اٹی ایسر مننگ نا گمان ءِ۔ اودااومیت نا درشانی ءِ ہم کرے کہ غیر ایسر مروک ویل آتا سی او پی 27 اٹی سرسہب نتیجہ اس دوئی مریک۔ شرہ نا ایسری ہیت آتے ٹی ریٹائرڈ سفیر شفقت کاکاخیل موسمیاتی بدلی تا توننگ کن منصفانہ وڑاٹ کاریم کننگ نا گرج آ زور شاغا۔ اوپاکستان نا قومی موافقت نا ڈٹ زوت آن زوت تیار کننگ نا گرج آ زور شاغا۔ دادود اٹ شریدار آک بھلو کچ اسے ٹی بشخ ہلکر ہرافک پیلنسٹ اتون اسہ پبی ءُ ہیت وگپ اس کریر و منتظمین آتا کوشست آتا ستاءِ کریر۔
