جنگلی حیات ءِ حفاظت، قدرتی آسراتی آنی مھکمیں   کارمرز کنگ ءُ دمگی آبادی ءِ دیمروئی یکے دومی ءَ را تقویت دات کنت، سید یوسف رضا گیلانی

اسلام آباد۔6ستمبر  (اے پی پی): ادارُکی صدر سید یوسف رضا گیلانی ءَ جنگلی زندمان ءِ رکھینگ، دمگی آبادی ءُ یک مشترکہ آیوکیں وھد ءِ ھاتر ءَ یکے دومی ءِ کمک ءِ ضلورت ءِ سر ءَ زور پر دات ءُ گوشت کہ جنگلی زندمان ءِ رکھینگ، قدرتی وسیلگ آنی مھکمیں  کارمردی ءُ دمگی آبادی ءِ دیمروئی ءِ وسیلگ ءَ یکے دومی ءَ را گیش مھکم کنگ بوت کنت۔ اے ھیالانی درشانی آئی ءَ سفاری کلب انٹرنیشنل ءِ نیمگ ءَ ادا برجم داشتگیں مراگش ءَ گوں تران کنان ءَ کت۔ مراگش ءَ سفاری کلب انٹرنیشنل ءِ پاکستان ءِ شاخ ءِ چیئرمین سید صمصام  علی بخاری، پیسریگیں وفاقی وزیر ءِ ھال ءُ اھوال قمر زمان کائرہ، پیسریگیں وفاقی وزیر ماحولیات ملک امین اسلم، صدر مملکت  ءِ جارکش مرتضی سولنگی ءُ درملک ءِ نمائندہ آں بھر زوری کت۔ ادارُکی صدر ءَ گوشت کہ انٹرنیشنل کنزرویشن گالا 2026 ءَ بھر زوری کنگ منی واستہ یک وشیں گپے، آئی ءَ سفاری کلب انٹرنیشنل پاکستان برانچ ءِ کوشست آناں ساڑات ءُ گوشت کہ ایشی ءَ جنگلی زند ءِ رکھینگ، سرپدی، شکاری آنی ھک ءُ ذمہ واریں شکار ءِ واستہ جزمیں راجی ءُ میاں اوستمانی مردم آناں یکجا کتگ۔ اے وڑیں پلیٹ فارم مارا میاں اوستمانی تجربگاں چہ فائدہ چست کنگ ءِ موہ دنت ءُ ہمے رنگ ءَ پاکستان ءِ جتا جتائیں ایکولوجیکل زون آنی تہ ءَ وتی زانت ءُ تجربگاں چہ دگنیا ءَ گوں بہر ءُ بانگ کنت۔ سید یوسف رضا گیلانی ءَ گوشت کہ پاکستان چہ طبیعی تنوع ءُ دگنیا ءِ لھتیں منفرد ءُ قابل ذکریں جنگلی زند ءَ چہ مالا مال انت، ایشی ءِ تہ ءَ مارکور، آئیبکس، یوریال ءُ بلو شیپ ھوار انت۔ اے طبیعی میراث ءِ رکھینگ مئے درستانی یک مشترکہ ذمہ واری یے ۔ آئی ءَ گوشت کہ مئے تجربگ ءَ اے گپ ثابت کتگ کہ جنگلی زند ءِ رکھینگ ءِ کوشست ھما وھد ءَ سوبمند بنت کہ پارلیمنٹ، حکومت، بنجاہی آبادی، شکاری، شکار ءِ مینیجرز ءُ جنگلی زند ءِ رکھینگ ءِ گل یکجاھی ءَ کار بہ کن اَنت۔ ادارُکی صدر ءَ گوشت کہ اخلاقی ءُ ذمہ واریں شکار، کانود ءِ رد ءَ ءُ پائیدار رنگ ءَ کنگ بیت، جنگلی زندمان ءِ رکھینگ ءِ تہ ءَ کمک رس ایت ءُ جنگلی زندمان ءِ ھمراھی ءَ نندوکیں دمگی کمیونٹیز ءِ واستہ ھم مزنیں نپ ءُ سیت پیداک کت کنت۔ آئی ءَ گوشت کہ زمینی رنگ ءَ راستیں بدلی آرگ ءِ واستہ المی اِنت کہ مئے کانود ءُ پالیسی ءِ رھبند آنی تہ ءَ دمگی چاگرد، جنگلی زند ءِ ماہرین، شکاری، شکار ءِ مینیجرز ءُ ایندگر جائزیں ھواریں مردمانی ھیال ءُ لیکہ آناں ھیال ءُ لیکہ کنگ بہ بیت۔ آئی ءَ گوشت کہ ذمہ وار شکار ءَ را زندمان ءِ تنوع ءُ جنگلی زند ءِ رکھینگ ءِ لوٹ آنی گوما ھمگرنچ دارگ ءِ واستہ مارا درستاں نزیکیں رابطہ ءُ یکے دومی ءِ سر ءَ سرپدی ءِ تہ ءَ کار کنگ لوٹ ایت ءُ ھمے رنگ ءَ ذمہ وار شکار آنی جائزیں کرد ءَ را منگ لوٹ ایت کہ آ کانود ءِ شرپ ءَ کن اَنت، اخلاقی شکار ءِ اصول آنی سر ءَ عمل کن اَنت ءُ جنگلی زند ءِ رکھینگ ءِ تہ ءَ وتی کرد ءَ پیلو کن اَنت۔ ادارُکی صدر ءَ گوشت کہ وتی ھک آنی گوما جنگلی زندمان ءُ آیوکیں نسل آنی ھوالگ ءَ وتی ذمہ واری ھم یکے دومی ءَ چہ جتا نہ بنت۔ مارا لائسنس یافتہ شکار ءِ مینیجرز ءَ را ہم ھاسیں اسٹیک ہولڈر ءِ بستار ءَ منگی اِنت۔ آ شکاری، جنگلی زند ءِ واکدار ءُ دمگی کمیونٹیز ءَ را یکجا کنگ ءِ تہا یک ھاسیں کردے پیلو کن انت، وھدے کہ آہانی عملی تجربہ پائیدار شکار ءُ جنگلی زند ءِ موثر انتظام ءِ تہا یک جوانیں کردے پیلو کنت۔ آئی ءَ گوشت کہ سفاری کلب انٹرنیشنل ءِ وڑیں ادارگ آنی جنگلی زند ءِ رکھینگ، جنگلی زند ءِ بندوبست، وانگ ءُ زانگ ءُ میاں اوستمانی کمک ءِ دیمروئی ءِ تہ ءَ ھاسیں کرد است انت، وھدیکہ آ سرجمیں دگنیا ءَ ذمہ واریں شکاری آنی نمائندگی ھم کن انت۔ آئی ءَ گوشت کہ پاکستان یک میاں اوستمانی نمونہ اِنت کہ جنگلی زندمان ءِ رکھینگ، قدرتی وسیلگ آنی پائیدار کارمردی ءُ بنجاہی آبادی آنی دیمروئی چون یکے دومی ءَ را مھکم کنگ بوت کنت، ایشی ءَ را گیش موثر جوڑ کنگ ءِ واستہ مئے پالیشی شفاف، یکوئی ءُ عملی بہ بنت۔ سید یوسف رضا گیلانی ءَ گوشت کہ وفاقی ءُ صوبائی ادارگ یکجائی ءَ کار بہ کن اَنت ءُ اے پالیشی آنی جوڑ کنگ ءِ وھد ءَ دمگی آبادی، جنگلی زند ءِ ماہرین، شکاری، شکار ءِ مینیجرز ءُ ایندگر جائزیں اسٹیک ہولڈر آنی توار ھم گوشدارگ بہ بیت۔ جنگلی زند ءِ رکھینگ ءِ ھاترا ایوک ءَ قانود ءُ رہبندانی وسیلہ ءَ سوبمند نہ بیت۔ ادارُکی صدر ءَ گوشت کہ رکھینگ ھما وھد ءَ سوبمند بیت کہ مردم جنگلی زندمان ءِ رکھینگ ءِ واستہ ھاسیں سبب ءُ انگیزہ ءِ واھند بہ بنت۔ مارا جنگلی زند ءِ بندوبست، زندمان ءِ رکھینگ، مالی وسیلگ ءُ جنگلی زند ءِ رکھینگ ءِ ھاتر ءَ ٹیکنالوجی ءِ وڑیں پڑاں یکے دومی ءَ چہ دربرگ ءِ بازیں موہ است انت۔ سید یوسف رضا گیلانی ءَ گوشت کہ مئے مول ءُ مراد ءِ ھاتر ءَ ھاسیں رنگ ءَ ھوار کنگ بہ بیت: جنگلی زند ءِ جان سلامتی ءِ آبادی، مھکمیں بنجاہی کمیونٹی، ذمہ وار ءُ اخلاقی شکار، موثر کانود ءُ آیوکیں نسل آنی واستہ پاکستان ءِ قدرتی ورثہ ءِ رکھینگ۔ آئی ءَ اے موہ ءِ سر ءَ پاکستان ءِ تر ءُ تاب ءَ آیوکیں میاں اوستمانی مہمان آناں وش اتک کت ءُ اے امیت سہرا کت کہ اے مچی ءِ ساھت ءَ مئے گپ ءُ تران ءُ تعامل آیوکیں سال آنی تہ ءَ گیش مھکمیں کمک ءُ عملی دیمروئی ءَ کمک رسیت۔ اے موہ ءِ سر ءَ تران کنان ءَ سفاری کلب انٹرنیشنل پاکستان برانچ ءِ چیئرمین سید سمسم علی بخاری ءَ گوشت کہ سفاری کلب انٹرنیشنل پاکستان برانچ جنگلی زندمان ءِ رکھینگ، قدرتی وسیلگ آناں پائیدار کارمرد کنگ ءُ ذمہ وار شکار ءِ دیمروئی ءِ واستہ سرگرمیں کرد پیلو کنگ ءَ انت۔ آئی ءَ گوشت کہ ایس سی آئی پاکستان برانچ راجی ءُ میاں اوستمانی تک ءَ جنگلی زند ءِ ماہرین، سیادی داروکیں سرکاری ادارگ ءُ چاگردی رکھینگ ءِ ادارگ آنی گوما کمک ءُ رابطہ آناں ھم دیمروئی دیگ ءَ اِنت تانکہ پاکستان ءِ جتا جتائیں ماحولیاتی نظام ءَ جنگلی زندمان ءِ رکھینگ ءُ قدرتی وسیلگ آنی پائیداریں انتظام ءِ واستہ موثر گامگیج آناں مھکم کنگ بہ بیت۔