اسلام آباد۔ 30 نومبر (اے پی پی) صدر مملکت ڈاکٹر عارف علوی بینکنگ محتسب نا 6 فیصلہ غاتا برخلاف نجی بینک انا اپیل آتے مسترد کرسا بینکنگ فراڈ نا 6 زہمی بندغ آتے 8 لکھ 27 ہزار روپئی آن زیات نا زر آتے پدی تننگ نا پرمان ءِ برقرار تخانے۔ صدر مملکت بینکنگ محتسب نا فیصلہ غاتا برخلاف حبیب بینک انا 5 وخت اس کہ میزان بینک انا 1 اپیل اسے مسترد کرسا نجی بینک آتے فراڈ زہمی تا دُزی مروک زر ءِ اوفتا بینک اکاؤنٹ اٹ جمع کرفنگ نا پارت کرینے۔ کیس آتا سرجم حوال آتا رداٹ غاوتروک محمد پرویز خان، کاشف لطیف، نعمت علی، انتظار احمد، آسیہ منظور و محسن شبیر ناحبیب بینک لمیٹد اٹ اکاؤنٹ آک ئسر۔ دابندغ آتے نادرست نمبرآتیان کال کننگا و کال کروک آ بندغ آک تینے بینک انا کمامدارآتا وڑاٹ ظاہر کرسا اوفتیان اوفتا جند انا معلومداری ءِ خواہسر ہرافتے دا کھاتہ دار آک تسر۔ فراڈ کروک آ بندغ آک پرویز خان نا اکاؤنٹ آن 3333000روپئی، کاشف لطیف آن 140000روپئی، نعمت علی آن 137489روپئی، انتظار احمد آن 119848 روپئی، آسیہ منظور آن 78780 روپئی و شبیر نا اکاؤنٹ آن 20108 روپئی فراڈ نا ذریعہ منتقل کریر۔ اوکان پد اوفتے بینک آن اوفتا اکاؤنٹ آتیان بھلو زر اس پیش تمنگ نا کلہو ملا۔ غاوتروک آک فراڈ نا کمک اٹ کشوک آ زر انا پدی تننگ کن بینک اتون رابطہ کریر ولے اوفتے ہچ ءُ ریلیف اس تننگتو اوکان پد اوفک ذاتی وڑاٹ بینکنگ محتسب تون رابطہ کریر تانکہ اوفتا غاوتا ازالہ مننگ کے۔ بینکنگ محتسب تینا فیصلہ ٹی نوشتہ کرینے کہ پیمنٹ سسٹم اینڈ الیکٹرانک فنڈ ٹرانسفر ایکٹ 2007 نا دفعہ 30 انا رداٹ فنڈز ٹرانسفر کننگ نا آسراتی آئی بی /ای ایف ٹی چینل شاری تے فائدہ و نسخان تا پاننگ آن بیدس مہیا کننگانے۔ دُن تو داآسراتی بیدس معلومداری آن فراوان کننگانے ہنداخاطرآن ہروڑنا مالی نسخان ءِ ’’صارف نا زمواری ‘‘ گوندنگ مفک۔ بینکنگ محتسب تینا فیصلہ ٹی نوشتہ کرینے کہ اگہ بینک فنڈز ٹرانسفر کننگ نا آسراتی آئی بی/ای ایف ٹی ءِ آپریشنل کتوکہ تو غاوتروک آک مالی نسخان آن بچنگ کریرہ، اوتینا فیصلہ ٹی نوشتہ کرینے کہ بینک قاعدہ و ضابطہ غا عملدرآمد نا ہچ ءُ شاہدی اس فراوان کننگ کتنے، ہنداخاطرآن بینک غاوتروک آتے فراڈ شدہ زرانا ادائیگی کے۔ بینکنگ محتسب نا دا فیصلہ نا برخلاف بینک صدر مملکت ءِ اپیل کرے۔ صدر مملکت تینا فیصلہ ٹی نوشتہ کرینے کہ بینک آتے غاو تروک آ دعویٰ تا نفی و تینا موقف نا دفاع نا پورو موقع تننگا ولے بینکنگ محتسب نا پرمان تے پدی ہلنگ نا بابت بینک ہچ ءُ توجیح اس پیش کننگ کتو۔ صدر مملکت تینا فیصلہ ٹی نوشتہ کرینے کہ بینک کانود نا رداٹ تینا کانودی زمواری تے پورو کننگ اٹ بے سہب مسنے۔ صدر مملکت بینکنگ محتسب نا فیصلہ غاتا برخلاف بینک انا غٹ اپیل آتے مسترد کرے۔
