اسہ قوم اس ہم زالبول آتے راجی و زرگزرانی سرجزآتے ٹی اوار کننگ آن بیدس شونداری نا پوسکن آ مزل آتے طے کننگ کپک، گورنر بلوچستان سید ظہور احمد آغا

کوئٹہ۔ 30 نومبر (اے پی پی) گورنر بلوچستان سید ظہور احمد آغا پارینے کہ دنیا نا اسہ قوم اس ہم زالبول آتے راجی و زرگزرانی سرجزآتے ٹی اوار کننگ آن بیدس شونداری نا پوسکن آ مزل آتے طے کننگ کپک، زالبول آتے مون آ ہِننگ نا اسہ وڑ وارخواہی و آسراتی فراوان کننگ تون اوار اوفتا آسانی تیکن پین عملی گام گیج کننگ نا گرج ءِ۔ داخیال آتا درشانی ءِ او بلوچستان اسمبلی ٹی ویمن پارلیمنٹرین فورم نا چیئرپرسن ڈاکٹر ربابہ خان بلیدی تون گورنر ہاؤس کوئٹہ ٹی اوڑدہی ٹی گپ وتران کرسا کرے۔ اوڑدہی ٹی فورم فار ڈگنیٹی انیشیٹیوز پاکستان نا سروک عظمی ٰ یعقوب و نصیر آباد نا راجی و قبائلی راہشون میر اسداللہ خان بلیدی ئسک ہم ساڑی ئسر۔ گورنر پارے کہ زالبول آک تعلیم و پٹ وپول تون اوار اوار ایلو زند انا بشخ آتے ٹی تینا لائخی تے منفسا دا پک کرینو کہ ملکی شونداری و شونہالی ٹی او ہراول دستہ نا کڑد ءِ ادا کننگ کیرہ، گرج دا ہیت انا ءِ کہ اوفتا تعمیری کڑد انا نئے بیرہ ستاءِ کننگے بلکن نرینہ غاتیا زرگزرانی وڑاٹ پورو سیبو نا راجی خول آن پیشن پیش تمنگ اٹ اوفتا کمک ءِ کننگے، دارداٹ ویمن پارلیمنٹرین فورم تون اوار راجی ادارہ و سنجیدہ و فہمیدہ بندغ آتے حکومتی گام گیج آتون تفوئی مریک۔ سید ظہور احمد آغا مخلوق ءِ زالبول آتا حق و واکداری و خاص وڑاٹ میرات اٹ اوفتا حق انا بارواٹ شعور بیدار کننگ نا گرج آ زور شاغسا پارے کہ عالم دینک، راجی تنظیمک و ہرذی فہیم بندغ نا توسط اٹ زالبول آتا حق انا بارواٹ آگاہی تننگ المی ءِ۔ اوپارے کہ اسہ راج اس ہم فیصلہ سازی نا فورم و زالبول آتا زرگزرانی شمولیت آن بیدس شون ہلنگ کپک۔ گورنر بلوچستان ویمن پارلیمنٹرین فورم نا چیئرپرسن ڈاکٹر ربابہ خان بلیدی نا پارلیمانی و جان جوڑی نا بشخ اٹی خذمت آتا ستاءِ کرسا پارے کہ بلوچستان اٹی جان جوڑی و تعلیم نا بشخ آتے ٹی گچینی کن اجتماعی کوشست آتے برجاتخنگک۔