اسلام آباد۔ 30 نومبر (اے پی پی) وزیراعظم نا خصوصی نمائندہ بین المذاہب ہم آہنگی و پاکستان علماء کونسل نا چیئرمین حافظ محمد طاہر محمود اشرفی پارینے کہ عالم اسلام نا ویل آتے ایسر کننگ کن پاکستان تینا پبی کڑد ءِ ادا کرسا کیک، اوغان ویل آ او آئی سی نا وزرائے خارجہ نا خصوصی دیوان ءِ بٹنگ نا ستاءِ کینہ، فلسطین نا حالیت آک گڑتی نا سوب ءُ، اسرائیل نا مکروہ عزم ءِ توننگ کن جہانی و اسلامی دنیا ءِ دمدستی گام گیج کروئی مریک۔ داہیت ءِ او تینا اسہ بیان اسے ٹی پارے۔ اوپارے کہ پاکستان عالم اسلام نا عظیم ءُ قوت اسے و دا عالم اسلام نا ویل آتیا چُپ سلنگ کپک، پاکستان امت مسلمہ نا ویل آتا ایسر وحدت و سیوت ءِ تکک۔ اونا پاننگ ئس کہ اوغانستان نا حالیت عالم اسلام و جہانی دنیا غان دمدستی وڑاٹ گام گیج کننگ نا خواست کیک، یخ انا موسم اٹ اوغانستان اٹی انسانی المیہ ودی مننگ کیک۔ حافظ محمد طاہر محمود اشرفی پارے کہ مملکت سعودی عرب نا کنڈآن او آئی سی نا وزرائے خارجہ نا خصوصی دیوان ءِ بٹنگ نا فیصلہ وزیراعظم عمران خان و سعودی عرب نا ولی عہد شہزادہ محمد بن سلمان نا تین پہ تینی سلابت نا بھرم ءِ، پاکستان دا دیوان نا مہمانداری اتون اونا پبی ستاءِ کننگ نا پڑو ءِ کیک۔ اوپارے کہ اوغانستان نا حالیت آتیا ریاست پاکستان نا غٹ زموارآک تینا کڑد ءِ ادا کننگ ءُ، اوغانستان نا امن ءِ پاکستان نا امن تکنہ، پاکستان نا عسکری و سیاسی سرکڑدہ غاتا موقف پیدوار ءِ کہ اوغان عبوری حکومت تون دنیا ءِ گپ و تران کرسا کسر اس کشوئی مرے۔ دا اہم ریسہ غا اوغانستان و اونا الس ءِ تنیا بایدے اِلنگپ۔ وزیراعظم نا خصوصی نمائندہ بین المذاہب ہم آہنگی پارے کہ او آئی سی نا وزرائے خارجہ نا خصوصی دیوان نا چرجوئی ٹی پاکستان نا وزارت خارجہ وزیر خارجہ شاہ محمود قریشی نا کماشی ٹی غٹ اسلامی ملک آتا زموارآتون رابطہ ٹی ءِ، عالم اسلام و جہانی دنیا اوغان حالیت آتیا پاکستان نا مثبت کڑد انا معترف ءِ۔ حافظ محمد طاہر محمود اشرفی پارے کہ اسرائیل نا گڑاس زموار مسلمان تا مقدس و فلسطین نا بابت ہراغیر زموارانہ رویہ ءِ تینا کرینے او مذمت نا قابل و است ہسونی نا قابل ءِ، پاکستان و اہل پاکستان تینا فلسطینی ایلم تتون تفوک ءِ و اسہ آجو و وتواجہ فلسطینی ریاست اسے نا ٹہیفنگ ہرانا دارالخلافہ القدس شریف مرے مسلم امہ نا امنائی فیصلہ ءِ۔ اوپارے کہ اسرائیل نا غاصبانہ و ظالمانہ گام گیج آتا سوب آن ڈیہہ نا امن ءِ خطرہ لاحق مننگ ءِ۔ اونا پاننگ ئس کہ فلسطین نا ویل آ ساڑی آ حالیت آتے ٹی مملکت سعودی عرب ہراموقف ءِ تینا کرینے ہمو امت مسلمہ نا ترجمانی ءِ۔
