اسلام آباد۔ 30 نومبر (اے پی پی) وزارت خزانہ پارینے کہ پاکستان ودکی نا بڑزکو کچ آن مون آ ہِننگ ءِ ولے داڑتون اوار اوار پدریسہ افراط زر انا زور انا ہم مون تروک ءِ۔ ادائیگی تیٹی توازن نا مستین نا تنکی، جہانی کہول آ افراط زر انا حالیت و جہانی اجناس نا نہاد آتیٹی بھلا ودکی نا سوب آن پاکستان اٹی ہم کبینی آ اثر تمانے۔ داہیت ءِ وزارت خزانہ نا کنڈآن جاری کروک ماہانہ اقتصادی اپ ڈیٹ اٹ پاننگانے۔ اقتصادی اپ ڈیٹ نا رداٹ پنجرجاتی گام گیج آتون اوار اوار طلب نا پالیسی نا انتظام و انصرام نا کمک اٹ حالیت آتے ٹی گچینی حکومت نا مطمع نظر ءِ۔ مالیاتی سوگوی، آبادی نا زرگزرانی وڑاٹ نزور تپہ غاتے خور و توانائی نا نہاد آتے ٹی ودکی آن بچفنگ حکومت نا مالیاتی پالیسی نا بنداوی مسخت ءِ۔ وزارت خزانہ نا رداٹ برجامالی سال انا اولیکو چار تُو اٹی ترسیلات زر اٹی 11.9 درسد نا کچ آن ودکی ریکارڈ کننگانے، جولائی آن ہلیس اکتوبر اسکان نا مد اٹ ترسیلات زر انا کچ 10.6 ارب ڈالر ئس ہرا تدوک آ سال انا ہندا مد اٹی 9.4 ارب ڈالر ئس، برآمد آتے ٹی ودکی نا کچ 32.2 درسد ئس، برجامالی سال انا بنائی 4 تُو اٹی برآمد آتیان 9.7 ارب ڈالر نا زرمبادلہ دوئی مس ہرا تدوک آ مالی سال انا ہندا مد اٹی 7.3 ارب ڈالر ئس، ہندا وڑ درآمد آتے ٹی 66.3 درسد نا ودکی ریکارڈ کننگانے۔ برجامالی سال اٹی 23.5 ارب ڈالر نا درآمد ریکارڈ کننگا ہرا تدوک آ سال انا ہندا مداٹی 14.1 ارب ڈالر ئسر۔ حسابات جاریہ نا کھاتہ غاتا نسخان 5.1 ارب ڈالر ریکارڈ کننگا ہرا تدوک آ سال انا ہندا مد اٹی منفی 1.3ارب ڈالر ئس۔ وزارت خزانہ نا رداٹ برجامالی سال انا اولیکو 4 تُو اٹی براہ راست پیشن نا زرکاری ٹی تدوک آ مالی سال انا ہندا مد انا مقابلہ ٹی 11.8 درسد نا کمتی ریکارڈ کننگانے۔ جولائی آن اکتوبر اسکان نا مد اٹی 662.1 ملین ڈالر نا براہ راست زرکاری ریکارڈ کننگا ہرا تدوک آ سال انا ہندا مد اٹی 750.6 ارب ڈالر ئس۔ جم درملکی زرکاری ٹی برجامالی سال اٹی ودکی ریکارڈ کننگانے، برجامالی سال اٹی جم درملکی زرکاری نا کچ 423.7 ملین ڈالر ئس ہرا تدوک آ مالی سال انا ہندا مد اٹی 323.9ملین ڈالر ئس۔ 23 نومبر 2021آ زرمبادلہ نا کوڑی تا کچ 22.57 ارب ڈالر ریکارڈ کننگا ہرا تدوک آ سال ہندا تاریخ آ 20.53 ارب ڈالر ئسر۔ وزارت خزانہ نا رداٹ برجامالی سال اٹی ایف بی آر نا کٹیا ٹی 36.8 درسد نا کچ آن نمو مسنے۔ جولائی آن ہلیس اکتوبر اسکان نا مد اٹی ایف بی آر 1843 ارب روپئی نا ریونیو یکجا کرے ہرا تدوک آ مالی سال انا ہند امد اٹی 1347 ارب روپئی ئس، نان ٹیکس ریونیو ٹی 27.4 درسد نا کمتی ریکارڈ کننگانے۔ برجامالی سال اٹی نان ٹیکس ریونیو نا مد اٹی 249 ارب روپئی یکجا کننگا ہرا تدوک آ مالی سال انا ہند امد اٹی 343 ارب روپئی ئس۔ حکومت نا سالانہ شونداری پروگرام نا رداٹ چندی ڈٹ آتے فنڈ جاری کننگ اٹ 250 درسد نا نمو ریکارڈ کننگانے، یکم جولائی آن ہلیس 3 ستمبر اسکان نا مد اٹی پی ایس ڈی پی نا رداٹ 392.7 ارب روپئی نا فنڈ جاری کننگا، تدوک آ مالی سال انا ہندا مد اٹی 112 ارب روپئی نا فنڈ جاری کننگاسس۔ وزارت خزانہ نا رداٹ برجامالی سال انا اولیکو چار تُو اٹی مالی نسخان نا کچ 438 ارب روپئی ئس ہرا تدوک آ مالی سال انا ہندا مد اٹی 484 ارب روپئی ئسر۔ پرائمری بیلنس 184 ارب روپئی ئس ہرا تدوک آ سال انا ہندا مد اٹی 258 ارب روپئی ئس۔ حکومت نا کنڈآن کشاری وام تا جاری کننگ اٹ برجامالی سال اٹی 6.5 درسد نا نمو ریکارڈ کننگانے۔ برجامالی سال اٹی کشاری وام تا کچ 381.3 ارب روپئی ریکارڈ کننگا ہرا تدوک آ سال انا ہند امد اٹی 358 ارب روپئی ئس۔ پاکستان اسٹاک ایکسچینج نا انڈیکس اٹ برجامالی سال انا اولیکو 4 تُو اٹی تدوک آ مالی سال انا ہندا مد انا مقابلہ ٹی 5.97 درسد کمتی ریکارڈ کننگانے۔ ہندا وڑ مارکیٹ کیپٹلائزیشن نا کچ اٹ ہم تدوک آ مالی سال نا مقابلہ ٹی کمتی بسنے۔ برجامالی سال اٹی مارکیٹ کیپٹلائزیشن نا کچ 44.25 ارب ڈالر ریکارڈ کننگا ہراتدوک آ مالی سال انا ہندا مد اٹی 53.22 ارب ڈالر ئسر۔ مالی سال انا اولیکو چار تُو اٹی 8،232 پوسکن آ کمپنی تا رجسٹریشن ریکارڈ کننگانے۔
