جنیوا۔ 30 نومبر (اے پی پی) انٹرنیشنل کمیٹی آف ریڈکراس (آئی سی آر سی) جہانی ڈونرآتیان خواست کرینے کہ او اوغان الس کن تینا مالی امداد اٹ ودکی کیر۔ آئی سی آر سی نا ڈائریکٹر آپریشنز ڈومینک سٹیل ہارٹ شش دے ئی دورہ اوغانستان آن پد چینی خبررساں ادارہ ءِ تروک آ انٹرویو ٹی پارے کہ او اوغانستان نا سویل اٹی اسہ ہسپتال اسے نا دورہ ءِ کریکہ ہراڑے اگست آن داتم اسکان داخل مروک آ غذائی کاختی نا گواچی چناتا کچ اِراہنداخہ مسنے و جہانی کہول آ غذائی کاختی نا کچ تدوک آ سال انا مقابلہ ٹی 30 درسد اسکان ودانے۔ اوخبڑدار کرے کہ اوغانستان اسہ انسانی بھسکاری سے نا دنگ آٹے و جہانی ڈونربرادری آن خواست کرے کہ و اوغان الس کن تینا مالی امداد اٹ ودکی کے۔ ڈائریکٹر نا پاننگ ئس کہ یخ آتا بنامسنے و درجہ حرارت نقطہ انجماد آن شیف ءِ، داحالیت آتے ٹی ہم اوغانستان نا مخلوق تون تینا خاہوت ءِ ولفنگ و باسن پچ اسکان نا پیسہ اف۔ اوپارے کہ دا بھاز مشکل ءُ حالیت ءُ و اگہ امداد اٹ ودکی کننگتو تو اوغانستان اسہ پین بھلو انسانی آفت اسے آن گدرینگک۔ آئی سی آر سی نا سینئر عہدیدار آک اوغانستان نا کمک اٹ چین نا کڑد اناستاءِ کریر۔
