اسلام آباد۔ 29 نومبر (اے پی پی) وزیرخارجہ شاہ محمود قریشی پارینے کہ ہراتم اسکان کشمیر نا ویل سفائی اٹ ایسر مفک ، ڈیہہ ٹی دیرپاامن مننگ کپک، سیاسی اختلاف آتیان پد ہم کشمیر نا ویل آ مچ آ پارلیمنٹ نا یک توار مننگ ستاکڑزک، غٹ ادارہ غاک اسہ پنہ غاٹو، 5 اگست 2019 نا اسہ کنڈی بھارتی گام گیج آن پد اقوام متحدہ تون اوار غٹ جہانی فورم تیا کشمیر نا ویل ءِ پبی وڑاٹ تالان کننگا،سلامتی کونسل اٹ اوفتا دعویٰ نا عملا نفی مس، او آئی سی، اقوام متحدہ غان پد ارٹ میکو بھلا فورم ءِ۔ پارلیمانی کمیٹی کشمیر نا دیوان دوشنبے نادے آ پارلیمنٹ ہاؤس اٹی اڈ ہلک ہراٹی پاکستانی نژاد امریکی ڈیموکریٹک راہشون طاہر جاوید دیوان اٹی بشخ ہلک۔ چیئرمین کشمیر کمیٹی شہریار آفریدی مقبوضہ جموں و کشمیر اٹ برجا انسانی حق انا بھلا خلاف ورزی تے جہانی فورم آ تالان کننگ آ پاکستانی پردیسی تا کڑد انا ستاءِ کرے، امریکی ڈیموکریٹک راہشون پارے کہ پیشن نا ملک رہینگوک آ پاکستانی کمیونٹی امریکہ ٹی بھاز متحرک ءُ، ننکن خوشی نا ہیت اسے کہ وزیراعظم پاکستان عمران خان صاحب بذریعہ وٹس ایپ پیشن نا ملک رہینگوک آ پاکستانی تتون رابطہ غاتے استوار کرینے۔ چیئرمین کشمیر کمیٹی پارے کہ وزیرخارجہ مخدوم شاہ محمود قریشی نا است انا حب اٹ منت وار اُن کہ او و اونا ٹیم امریکہ تون اوار چندی ملک آتے ٹی، مقبوضہ جموں و کشمیر نا بابت اہم شخصیت آتون اوڑدہی تیٹی کنا کمک ءِ کریر، وزیر خارجہ نا منت وار اُٹ کہ او نیویارک اٹی او آئی سی کنٹیکٹ پڑک کشمیر نا دیوان اٹی کنے بشخ ہلنگ نا موقع اس تس۔ وزیرخارجہ مخدوم شاہ محمود قریشی دیوان اٹی بھارتی غیر کانودی کوزہ گیری جموںو کشمیر نا حالیت آتا بابت حوال ترسا پارے کہ 27 اکتوبر 1947 آن کشمیر نا ویل ءِ، غٹ حکومت آک کشمیر نا ویل ءِ زندہ تخنگ نا تینا ہرممکن کوشست کرینو۔ مخدوم شاہ محمود قریشی پارے کہ ہندوستان، پاکستان ءِ شیف نشان تننگ کن ہرموقع ءِ کاریم اٹ اتنگ نا کوشست کیک، ہراتم اسکان کشمیرنا ویل سفائی اٹ ایسر مفک ہمووخت اسکان ڈیہہ ٹی دیرپا امن مفک، ستاکڑزوک ہیت دادے کہ سیاسی اختلاف آتیان پد ہم کشمیر نا ویل آ مچ آ پارلیمنٹ یک توار ءِ و غٹ ادارہ غاک اسہ پنہ غاٹو، 5 اگست 2019 نا اسہ کنڈی بھارتی گام گیج آن پد اقوام متحدہ تون اوار غٹ جہانی فورم تیا کشمیرنا ویل ءِ پبی وڑاٹ تالان کننگا، ہندوستان ، داتاثر ءِ تننگ نا کوشست کریکہ کہ دااونا تہہ نا باندات اسے، سلامتی کونسل اٹ اونا دعویٰ تا عملا نفی مس۔ او آئی سی، اقوام متحدہ غان پد ارٹ میکو بھلا فورم ءِ۔ مخدوم شاہ محمود قریشی پارے کہ کشمیر نا ویل انا بابت او آئی سی نا اسیجائی اعلامیہ پبی وڑاٹ مون آ بس، کوزہ گیر کشمیر اٹی برجا انسانی حق انا بھلا خلاف ورزی تے نن ہیومن رائٹس کونسل اٹ ہرفین، کنے ہاؤس آف کامنز اٹ اسہ پارلیمانی ڈل اس دننگ نا موقع ملا ہراٹی پارلیمان اٹ ساڑی غٹ جماعت آتا نمائندگی ساڑی ئس، اِرا ایٹمی واکدار آتا جنگ انا کنڈآ ہِننگ خودکشی آنبار ءِ، غٹ پیچیدہ غان پیچیدہ ویل، بیرہ ہیت وگپ انا کمک اٹ ایسر مننگ کیک، ننا پیدوار موقف ءِ کہ اقوام متحدہ سلامتی کونسل نا قرارداد آتے مون آتخسا کشمیری تا است خواہی نا رداٹ ایسر کننگے۔ بھارت نا 5 اگست 2019 نا گام گیج جہانی کانود آتا اسُل خلاف ورزی ءِ، ہندوستان ، مقبوضہ جموں و کشمیر اٹی آبادی کچ ءِ بدل کننگ اٹ لگوک ءِ، ہندوستا ن نا ہندتوا سوچ، مقبوضہ جموں و کشمیر نا مسلم اکثریت ءِ اقلیت اٹ بدل کننگ خواہک، ہندوستان دروغ آ مبنی تاثر تننگ نا کوشست کرے کہ 5 اگست 2019 نا گام گیج کشمیری تا گچینی کن ءِ، دا گام گیج آتیان کشمیری تا زرگزران بھسکاری آن دوچار مس، دا گام گیج آتیان پد، کشمیری تیٹی بھارت سرکارنا برخلاف خار اٹی ودکی مس۔
