اسلام آباد۔ 29 نومبر (اے پی پی) بنجائی وزیر ڈٹ بندی شونداری و اصلاحات و خصوصی گام گیج و نیشنل کمانڈ اینڈ آپریشن سینٹر نا سروک اسدعمر پارینے کہ 5 کروڑ ءِ اِرا خور وخت اس کہ 3 کروڑ ءِ اسہ ویکسین اس خلنگانے، الس آن خواست ءِ کہ دین انا پوسکن آ وڑآن بچنگ کن ویکسی نیشن المی کرفر۔ اودوشنبے نادے آ این سی او سی ٹی دیوان آن پد وزیراعظم نا خصوصی کمکار جان جوڑی ڈاکٹر فیصل سلطان تون میڈیا تون گپ وتران کرساپارے کہ کورونا دین انا پوسکن آ وڑبھاز ترندی اٹ تالان مننگ ءِ ہراکہ ساؤتھ افریقہ نا شار بوٹسوانا آن پیش تمسا ہانگ کانگ و کیئی یورپی ملک آتسکان سرمسنے دارداٹ ملک اٹ ٹیسٹنگ نا عمل ءِ ترند کننگک و ہراڑے دا دین انا تالانی نا زیات خطرہ ءِ ہموڑے کورونا ویکسین نا بوسٹر ڈوز انا بناءِ کننگک۔ اوپارے کہ پاکستان اٹ ویکسی نیشن نا ترند انگا عمل نا سوب آن کورونا دین نا کیس آتے ٹی پیدوار کمتی اس مون آ بس۔ داکان بیدس غٹ صوبائی حکومت آتون اواری اٹ ویکسی نیشن نا عمل ءِ پین ترند کننگک۔ اسد عمر مستی پارے کہ سویلی افریقہ ٹی اینو آن دُوانزدہ دے مست اسکان کورونا نا مثبت کیس آتا کچ 0.9 درسد ئس ہراکہ داسہ 9.77 درسد اسکان سرمسنے دارداٹ گڑاس ملک آتا بابت سفری پابندی ہم خلنگانے و مستی گام گیج کننگک۔ اوالس آ خصوصی زور شاغا کہ ہموبندغ آک ہرافک داسکان ویکسی نیشن کرفتنو یا ارٹ میکو خور ءِ خلفتنو یا 12 سال اسکان نا چناتے ویکسی نیشن کرفنگ تنے او دمدستی وڑاٹ ویکسی نیشن کرفر تانکہ داکورونا دین انا دا پوسکن آ وڑ آن بچفنگ مرے۔ داوخت آ وزیراعظم نا خصوصی کمکار جان جوڑی ڈاکٹر فیصل سلطان پارے کہ تدوک آ اِراسال آن اواری اٹ فیصلہ کرین ہرافتا سوب کورونا دین انا تالانی ءِ توننگ اٹ سرسہبی مس تدوک آ منہ دے آن کورونا دین انا دا پوسکن آ وڑاٹ ودکی مون آ بننگ ءِ ، و یورپی ملک آتے ٹی زیات مرک ہموبندغ آتے ٹی مون آ بننگ ءِ ہرافک ویکسین کرفتنو یا ویکسی نیشن نا عمل اٹ تاخیر کرینو ۔ او الس آ زور شاغا کہ دا دین آن بچنگ کن ویکسین زوت آن زوت خلفر تانکہ دا موذی دین آن بچنگ مرے۔ اومستی پارے کہ دا پوسکن آ دین انا ساخت ہندن ءِ کہ ہرا زیات ترندی اٹ تالان مننگ نا سوب مننگ ءِ۔ اوالس ءِ پارت کرے کہ راجی فاصلہ و ماسک انا پابندی ءِ المی کیر۔
