جہانی منڈی تیٹی کولانا نہاد اٹی کمتی آن پاکستان ءِ لکھ آ ڈالر نا بچت دوئی مریک، ترجمان سلاہکار خزانہ

اسلام آباد۔ 29 نومبر (اے پی پی) وزیراعظم نا سلاہکار خزانہ نا ترجمان مزمل اسلم پارینے کہ جہانی منڈی تیٹی کولانا نہاد اٹی کمتی آن پاکستان ءِ لکھ آ ڈالر نا بچت دوئی مریک، سرفہرست 100 کمپنی تا سیلز اٹ ودکی 2،000 ارب روپئی اسکان سرمسنے۔ دوشنبے نادے آ راجی رابطہ نا ویب سائٹ ٹویٹرآ جاری ٹویٹس اٹی اوپارے کہ تدوک آ منہ تُواٹی پاکستان نا کنڈآن کولانا درآمد اٹی دوگنا ودکی مسنے۔ اوپارے کہ دا ہیت ستاکڑزک کہ جہانی منڈی تیٹی کولانا نہاد اٹ کمتی بننگ ءِ ہراڑآن پاکستان ءِ لکھ آ ڈالر نا بچت دوئی مریک۔ ترجمان پارے کہ ملک اٹ کاروبار و خوردہ فروشی ٹی نمان ودکی ریکارڈ کننگانے۔ سرفہرست 100 کمپنی تا سیلز اٹ ودکی داسہ 2،000 ارب روپئی اسکان سرمسنے، ہرا تدوک آ سال انا مقابلہ 70 درسد زیات ءِ۔ 2018 ء نا مقابلہ ٹی ریٹیل بزنس اٹ کم و ود 33 درسد ودکی مسنے۔ اوپارے کہ دا حساب وکتاب آن ملک اٹ گچین وقوت خرید نا ننا دعواک پک مننگ ءُ۔ ترجمان تینا ٹویٹ آتے ٹی دابابت دستاویز آتے ہم شیئرکرینے۔