اسلام آباد۔ 29 نومبر (اے پی پی) پاکستان تحریک انصاف نا حکومت چین پاکستان اقتصادی راہداری ڈٹ(سی پیک) نا رداٹ مچ آ ملک اٹی 4 خصوصی اقتصادی زون تیا ترندی اٹ کاریم نا بناءِ کرے ، دازون تا جوڑ کننگ آن بالواسطہ کم و ود 5 لکھ 35 ہزار و بلاواسطہ 10 لکھ روزگارنا وارخواہی دوبریک وخت اس کہ ملکی برآمد آتے ٹی ہم خاطرخواہ ودکی مریک۔ زرکاری بورڈ انا کمامدارآک اے پی پی ءِ پاریر کہ خصوصی اکنامک زون تا جوڑ کننگ آن براہ راست روزگار نا وارخواہی تتون اوار اوار بالواسطہ وڑاٹ علامہ اقبال انڈسٹریل سٹی فیصل آباد اٹی ہندی آبادی ءِ 2 لکھ، رشکئی اسپیشل اکنامک زون اٹی 2 لکھ، بوستان اکنامک زون اٹی 55 ہزار و دھابیجی اسپیشل اکنامک زون اٹی 80 ہزار روزگار نا وارخواہی دُوبریک۔ خصوصی اقتصادی زون تا جوڑ کننگ کن صوبہ غاک چندی ہند آتا پیدواری ءِ کریسر ہرافتے ٹی خیبرپختونخوا نا کنڈآن رشکئی اکنامک زون و سندھ انا کنڈآن چائنہ اکنامک زون دھابیجی ، بلوچستان نا کنڈآن بوستان اکنامک زون و پنجاب نا کنڈآن فیصل آباد اٹی علامہ اقبال انڈسٹریل زون اوار ءُ و سی پیک نا ارٹ میکو ریسہ ٹی چین نا کمک اٹ پاکستان اٹ دا صنعتی زون تیا پیش رفت برجاءِ۔ زرکاری بورڈ انا کمامدارآتارداٹ چین پاکستان اقتصادی راہداری ڈٹ (سی پیک) نا رداٹ خیبرپختونخوا نا ضلع نوشہرہ ٹی واقع رشکئی اقتصادی زون آ کاریم ترندی اٹ برجاءِ، پاک چین صنعتی کمکاری پاکستانی ءِ ڈیہہ ٹی پیدواری ہند اس جوڑ کیک، صنعتی زون تا جوڑ کننگ آن ہندی صنعت کار آتے کن زرکاری نا بے شمار وارخواہی ودی مریک۔ رشکئی اکنامک زون اٹ 2000 آن زیات ملکی و درملکی زرکاری نا عندیہ تسنے۔ اسہ ہزار ایکڑ ڈغار آ تالان دا زون ترند رفتار صنعت کاری نا مون آ دننگ کن مزل نا نشان مریک۔ بنجائی حکومت دا زون ءِ مسہ ریسہ غاتے ٹی بشخانے ہرانا رداٹ 210 میگاواٹ بجلی مسہ ریسہ غاتے ٹی حکومت فراوان کیک۔ دا زون اکن حکومت 1203 ملین روپئی گیس انا مد اٹ تخانے۔ اولیکو ریسہ ٹی 247 ایکڑ، ارٹ میکو ریسہ ٹی 355 ایکڑ و مسٹ میکو ریسہ ٹی 399 ایکڑڈغار ڈویلپ کننگک۔ دازون اٹ 80 درسد ہندی مخلوق ءِ روزگار فراوان کننگک، رشکئی خصوصی اقتصادی زون ایئرپورٹ ، ڈرائی پورٹ، ریلوائی اسٹیشن، موٹروے و شاہراہ تا توسط اٹ پاکستان نا غٹ صوبہ غاتون منسلک ءِ۔ دا زون کے پی کے پنچ بھلا ضلع نوشہرہ، مردان و صوابی، چارسدہ و پشاور نا سنگم آ واقع ءُ۔ منسلک ضلع غاتے ٹی ڈغار ذرخیز ءِ، ہرا چندی وڑنا نغد آور فصل و سوزی تا دسنگ کن جوان ءِ۔ رشکئی خصوصی اقتصادی زون اٹ 400 آن زیات صنعت اوار مریرہ ہرافتے ٹی گارمنٹس و ٹیکسٹائل نا مصنوعات، اُرائی گڑا، لس واپاری گڑا، الیکٹرانکس و بجلی نا ازباب، آٹوموبائل و مکینیکل گڑاک اوار ءُ۔ نوشہرہ، مردان و پشاور اٹی کیہی دواساز کمپنیک اریر۔ زرگزرانی زون اٹ ہزار آ زالبول آک اوار مریرہ ہرا ہڑدے ئی تینا اُرا و تینا کاریم نا ہند انا نیام اٹ سفر کریرہ۔ رشکئی خصوصی اقتصادی زون اصل اٹ ہندی زالبول آتے واکدار کننگ کن اسہ ذریعہ سے۔ اقتصادی زون اٹ میوہ و خور انا گڑاتا پیکجنگ، ٹیکسٹائل سٹچنگ ونیٹنگ و ایلو تعلقدار صنعت آتا جوڑ کننگ و اوفتے کن آسراتی آ چکار کننگک۔ داصنعتی بستی آن ایئرپورٹ نا فاصلہ 65 کلومیٹر، ڈرائی پورٹ 65 کلومیٹر، ریلوائی اسٹیشن 25 کلومیٹر، سٹی سینٹر 15 کلومیٹر، ہائی وے 5 کلومیٹر و موٹروے بالکل گنڈوک ءُ۔ ہنداوڑ علامہ اقبال اکنامک زون فیصل آباد اٹی ہم ترند رفتاری اٹ کاریم برجاءِ۔ 3 ہزار 2 سد ایکڑ آ تالان مریک، دا صنعتی ڈٹ پاکستان نا زرگزران کن گیم چینجر اس جوڑ مریک۔ کمامدارآتارداٹ ہنداوڑ پنجاب نا صنعتی شار فیصل آباد اٹی سی پیک نا رداٹ علامہ اقبال انڈسٹریل سٹی نا رداٹ 3 لکھ آن زیات ملازمت ودی مریک۔ ہندی مخلوق کن 200،000 آن زیات روزگار نا وارخواہی ودی کیک و پاکستان اٹ زرگزرانی انقلاب اس اتیک۔ بلوچستان اٹی بوستان انڈسٹریل نا خصوصی اقتصادی علاقہ صنعت کاری ءِ مون آ دننگ کن تیار ءِ۔ ہر زون اسہ ہزار ایکڑآ تالان مریک، دازون اٹی میوہ غاتا پروسیسنگ، کشت وکشار نا مشینری، دواجوڑ کننگ، موٹربائیک اسمبلی، کرومائٹ، کُن و خور انا تیل، سرامک صنعت، برف و کولڈ اسٹوریج، بجلی نا گڑا، جلال فوڈ انڈسٹری خلنگک۔ ہنداوڑ صوبہ سندھ اٹی سی پیک نا رداٹ دھابیجی خصوصی اقتصادی زون آ ترندی اٹ کاریم برجاءِ ہراڑکن 1530 ایکڑ ڈغار ہلنگک۔ دازون اٹ اسٹیل فاؤنڈر، آٹوموٹو و آٹوپارٹس، کیمیکل و دواجوڑ کننگ، کنزیومرالیکٹرانکس انجینئرنگ، ٹیکسٹائل و گارمنٹس، ویئرہاؤسنگ ، تعمیراتی گڑا و ایف ایم سی اوار ءُ۔
