اسلام آباد- 27 نومبر (اے پی پی) پاکستان ءَ بھارت ءِ ناشرکار دوستیں ہندو آنی گل راشٹریہ سوامی سیوک سنگھ (آر ایس ایس) ءِ سروک موہن بھگوت ءِ گیر زمہ واریں ءُ کسد ءُ کینگ شنگ کنوکیں ریمارکس ءَ را گوں ترندی ءَ ایر جتگ۔ ناشرکار دوستیں ہندوآنی گل راشٹریہ سوامی سنگھ (آر ایس ایس) ءِ سروک موہن بھگوت ءَ برصغیر ءِ بھر ءُ بانگ ءِ کار ءَ را واپس کنگ ءِ لوٹ کتگ بوتگ۔ شمبے ءِ روچ ءَ شنگ کتگیں وتی بیان ءِ تہ ءَ درئی کارانی وزیر ءِ جارچین ءَ موہن بھگوت ءِ گیر زمہ واریں ءُ کسد ءُ کینگ شنگ کنوکیں ریمارکس ءَرا گوں ترندی ءَ ایر جتگ۔ آئی ءَ گوشتگ کہ پاکستان بھارت ءِ تہ ءَ ناشرکار دوستیں ہندوآنی تنظیم آر ایس ایس ءُ بی جے پی، ءِ ناشرکار دوستیں ہندو لیکہ (ہندو راشٹرا) ہندو ءُ اکھنڈ بھارت ءِ سر ءَ جوڑ بوتگیں درئی کارانی پالیشی ءِ سبب ءَ دمگی ایمنی ءِ سر ءَ استیں حطرہ ءِ بار بار گپ کتگ۔ جارچین ءَ گوشتگ کہ دگنیا بھارت ءِ تہ ءَ درئی نیکی راھ ءِ منوک ھاس مسلمان آنی حک آناں نہ دیگ ءُ جموں کشمیر ءَ کشمیری آنی سر ءَ ظلم ءُ ناحقی ءِ گواہ انت۔
