اسلام آباد۔ 26 نومبر (اے پی پی) وزیرخارجہ مخدوم شاہ محمود قریشی تون ’’دعوت اسلامی‘‘ نا ہشت باسکی ڈل جمعہ نادے آ وزارت خارجہ ٹی اوڑدہی کرے۔ ڈل اٹی حاجی یوسف سلیم، احتشام عطاری، سلیم بلال، محمد عمران، آصف پولانی، اختراسماعیل، و یوسف سلیم ئسک اوار ئسر۔ دعوت اسلامی نا ڈل وزیر خارجہ ءِ معلومدار کرے کہ ’’دعوت اسلامی‘‘ اسہ غیرسیاسی ءُ تنظیم اسے ہرا مچ آ دنیاٹی دعوت و تبلیغ تون اوار اوار آسودہی کاریم تیٹی زیات آن زیات بشخ ہلیک ۔ دارالمدینہ اسکول سسٹم دنیا نا چندی ملک آتے ٹی تعلیم و تربیت نا کاریم سرتننگ ءِ۔ حاجی سلیم عطاری وزیرخارجہ ءِ پارے کہ نوکاپ، قدرتی آفت خاص وڑاٹ کورونا دین اٹی دعوت اسلامی زہمی تا است انا حب اٹ کمک کرے۔ او وزیرخارجہ ءِ معلومدار کرے کہ دعوت اسلامی ’’تھیلاسمیا فری پاکستان‘‘ نا آسودہی ڈٹ آ کاریم کننگ ءِ و داتم اسکان تھیلیسمیا نا ناجوڑ آتے دترنا 42 ہزار بیگ عطیہ کرینے۔ وزیرخارجہ دعوت اسلامی نا آسودہی سرجزآتا ستاءِ کرسا پارے کہ اسلام، ایلمی، مہر ومریبت و اخوت نا درس ایتک۔ اوپارے کہ اوغانستان داوخت آ زرگزرانی تنکی آن گدرینگ انگ ءِ۔ حکومت پاکستان جہاز آتا کمک اٹ و زمینی کسر اٹ انسانی امداد و دوائی اوغانستان آ گدریفے ۔ شاہ محمود قریشی پارے کہ اوغانستان 38 ملین آبادی نا ملک ءِ، تدوک آ اِراسال آن ہموڑے قحط کون آ حالیت آک ءُ۔ گرج داہیت انا ءِ کہ انسانی ہمدردی نا بنداو آ اوغان شاری تا دمدستی امداد ءِ پک کننگے۔ وزیرخارجہ پارے کہ نن اوغان شاری تا انسانی بنداو تیا کمکاری کن جہانی برادری تون پدریسہ رابطہ ٹی اُن۔ ننے اومیت ءِ کہ جہانی برادری، مستین نا ردینک آتیان سبخ ہلسا اوغانستان ءِ تنیا اِلیپک۔ ڈل وزیر خارجہ ءِ مرکز فیضان مدینہ کراچی دورہ نا سلہ خلک ہرادے او منت واری اتون امنا کرے۔
