لاہور۔ 26 نومبر (اے پی پی) بنجائی وزیر تعلیم و کسبی تربیت شفقت محمود پارینے کہ ملک اٹ اسکول آتیان پیشن چناتا مننگ، کم شرح خواندگی و کوویڈ نا دین اٹی تعلیم نا نسخان بھلا ویل آتیٹی اوار ءُ ہرافتا ایسری کن حکومت اولیتی بنداو تیا گام گیج کننگ ءِ۔ او جمعہ نادے آ داڑے ہندی ہوٹل اٹ جاپان انٹرنیشنل کارپوریشن ایجنسی (جائیکا) نا اولیکو جوائنٹ کوآرڈی نیشن کمیٹی میٹنگ آن تران کریکہ ۔ داوخت آ پاکستان اٹ جائیکا نا چیف نمائندگان، صوبائی سیکرٹریز مینجمنٹ تون اوار چندی ادارہ غاتا نمائندہ غاک ساڑی ئسر۔ بنجائی وزیر تعلیم پارے کہ اسکول آ ہِنپروک آ 78 درسد چناتا وئی 10 آن 16 سال نا نیام اٹی ءِ ہرافتے اسکول آتیا پدی اتنگ اسہ چیلنج اسے۔ اوجائیکا نا تعلیم نا بابت آخبت نا ڈٹ آتا ستاءِ کرے و پارے کہ غیررسمی تعلیم صوبائی معاملہ اسے، صوبائی حکومت آتے مرے کہ او غیر رسمی تعلیم آ ہم چکار تخر ہراڑکن ننے گچین رابطہ غاتا گرج ءِ۔ بنجائی وزیر پارے کہ ننے اُراٹی تولوک تعلیم کننگ، بھلا وئی نا بندغ آتے تعلیم تننگ، لرننگ لیول ءِ کیئر کننگ و لرننگ کن ٹیکنالوجی نا کمک اٹ ٹیچر آتا ڈیوٹی آ ساڑی گری و لیکچر نا مانیٹرنگ کن میکنزم اس تیار کننگ نا گرج ءِ۔ اوپارے کہ کوویڈ اٹی ٹیلی اسکول سسٹم نا بناءِ کننگ تون اوار اوار حکومت علامہ اقبال اوپن یونیورسٹی تون لرننگ ٹی وی چینل آتا بناءِ کننگ کن کاریم کرے۔ اوجائیکا نا بنجائی و صوبائی لٹریسی ڈیپارٹمنٹ تون کاریم نا ستاءِ کرے۔ اوپارے کہ حکومت اسکول آتیان پیشن چناتے اسکول آ اتنگ تون اوار اوار اسہ قومی نصاب اسے کن کاریم کننگ ءِ ہراڑآن ملک اٹ تعلیم نا پڑاٹ انقلاب بریک۔ اوپارے کہ ہراچناک 10 سال نا وئی ٹی نیزگاری یا پین سوب اسے آن اسکول ءِ ہلرہ اوفتے کن اسلام آباد اٹی پائلٹ پروجیکٹ نا بناءِ کننگانے ہراٹی داچناتے سکلڈ بیسڈ ٹریننگ فراوان کننگک تانکہ لمہ وباوہ اوفتے کسبکار کننگ تون اوار اوار تعلیم ہم فراوان کننگ کیر۔ اوداگرج آ زور شاغا کہ ٹیکنیکل ایجوکیشن ہم جنرل ایجوکیشن نا بایدے بشخ اس مرے داکان بیدس ننے ریسرچ بیسڈ پالیسی نا گرج ءِ وخت اس کہ ننا فیصلہ غاک ہم ریسرچ نا بنداو آ بایدے مریر۔ ہنداوڑ اسیسمنٹ نا وڑ ءِ ہم اول سرآن ترتیب تننگ نا گرج ءِ۔ اوپارے کہ کوویڈ۔ 19 اٹی فاصلاتی تعلیم نا اہمیت اٹ ودکی مس، حکومت نان فارمل ایجوکیشن آ چکار کننگ ءِ تانکہ ملک اٹ تعلیم نا کمک اٹ مون آ شون تننگ مرے۔ اوپارے کہ ’’میٹرک ٹیک‘‘ لرننگ پروگرام لمہ و باوہ نا تعلیم آ چکار کرفنگ نا کنڈآ بھلو ڈٹ اسے۔ اودااست خواہی نا درشانی ءِ کرے کہ جائیکا بنجائی و صوبائی حکومت آتون غیر رسمی تعلیم ءِ مون آ دننگ کن کمک کرسا کیک۔ داوخت آ بنجائی و صوبائی لٹریسی و غیر رسمی تعلیم نا ادارہ غاتا نمائندہ غاک تینا کارکڑد ءِ مون آتخار و سلاہ پیش کریر۔ جوائنٹ سیکرٹری بنجائی وزارت تعلیم و پروفیشنل ٹریننگ وسیم امجد چدھڑ داوخت آ جائیکا نا عملی پروجیکٹ نا ستاءِ کرے۔
