کوئٹہ۔ 26 نومبر (اے پی پی) شش سال مست بناکروک آ پسنی فش ہاربر نا بحالی ناڈٹ اٹی پروجیکٹ ڈائریکٹرز و ایلوفتا اواری اٹ قومی خزانہ ءِ کروڑ آ روپئی نا نسخان تننگا ہرا 11 سال آن پد ہم بے پورو ءِ، نیب پروجیکٹ ڈائریکٹرز تون اوار 6 بندغ نا برخلاف احتساب عدالت اٹ دائرکرے۔ ترجمان نیب بلوچستان نا بیان نا رداٹ فش ہاربر نا بحالی و توسیع نا ڈٹ کرپشن نا گواچی مس، قومی احتساب بیورو بلوچستان پسنی فش ہاربر اتھارٹی نا پروجیکٹ ڈائریکٹرز منیر احمد، علی گل کرد، ڈپٹی پروجیکٹ ڈائریکٹر عبدالرب، اسسٹنٹ انجینئر خلیل احمد، سی ای او مہران انجینئرنگ ورکس ندیم ظفر و ضہیم عباس نا برخلاف قومی خزانہ ءِ کروڑ آ روپئی نا نسخان تننگ نا دوبہ ٹی ریفرنس احتساب عدالت کوئٹہ ٹی دائرکرینے۔ حکومت بلوچستان پسنی فش ہاربر نا بحالی و ودکی کن 800 ملین روپئی نا گرانٹ نا ڈٹ آ عملدرآمد کن 2010اٹی پی سی ون جوڑ کرے و 2015ٹی باقاعدہ کاریم نا بناءِ کننگا۔ ودکی وبحالی ڈٹ انا پی سی ون نا رداٹ پسنی فش ہاربر ءِ فعال کننگ کن ڈریجر ہلسا بریک واٹر/رکھی پشت آتا رکھ و جوڑجاڑ کننگ ئس وخت اس کہ دوبہ دار آک کاریم کننگ آن بیدس ڈٹ اکن جاری زر اٹ کرپشن کرسا قومی خزانہ ءِ 32 کروڑ روپئی آن زیات نا نسخان تسر۔ است ہسونی نا ہیت دادے کہ ڈٹ کرپشن نا سوب آن یانزدہ سال گدرینگ انگ آن پد ہم داسکان پورو اف۔ نیب بلوچستان نا جاست وپاستی ٹیم پروجیکٹ ڈائریکٹرز منیر احمد، علی گل کرد، ڈپٹی پروجیکٹ ڈائریکٹر عبدالرب انجینئر خلیل احمد، سی ای او مہران انجینئرنگ ورکس ندیم ظفر و زعیم عباس نا برخلاف ناقابل تردید شاہدی تے مون آ تخسا ریفرنس احتساب عدالت کوئٹہ ٹی داخل کرینے۔