اسلام آباد۔ 26 نومبر (اے پی پی) کینیڈا ٹی کاریم کروک آ پاکستانی تا زرراد کننگ اٹ برجامالی سال انا اولیکو چار تُو اٹی تدوک آ مالی سال انا ہندا مد انا مقابلہ ٹی 38.5 درسد نا نمو ریکارڈ کننگانے۔ اسٹیٹ بینک نا کنڈآن دا بابت جاری کروک حساب وکتاب نا رداٹ برجامالی سال انا اولیکو چار تُو اٹی کینیڈا ٹی کاریم کروک آ پاکستانیک 216.7 ملین ڈالر نا زرمبادلہ ملک آ مون تسر ہرا تدوک آ مالی سال انا ہند امد انا مقابلہ ٹی 38.5 درسد زیات ءُ، تدوک آ مالی سال انا ہندا مد اٹی کینیڈاٹی کاریم کروک آ پاکستانیک 156.7ملین ڈالر نا زرمبادلہ ملک آ مون تسوسر۔ اکتوبر 2021اٹی کینیڈاغان ترسیلات زر انا کچ 54.2 ملین ڈالر ریکارڈ کننگا ہرا تدوک آ سال اکتوبر نا مقابلہ ٹی 38.26 درسد زیات ءُ، تدوک آ سال اکتوبر اٹ کینیڈاغان ترسیلات زر انا کچ 39.2 ملین ڈالر ریکارڈ کننگاسس۔ ساڑی حکومت نا کنڈآن کانودی و بینکنگ ذریعہ اٹ ترسیلات زر انا است بڈی کن گام گیج، آسراتی و ترغیب آتا نتیجہ ٹی برجامالی سال انا اولیکو سہ ماہی ٹی سمندر پار پاکستانی تا ترسیلات زراٹی پدریسہ ودکی مننگ ءِ و برجامالی سال انا اولیکو چار تُو اٹی تدوک آ مالی سال انا ہندا مدانا مقابلہ ٹی ترسیلات زر اٹ جم وڑاٹ11.9 درسد نا نمو ریکارڈ کننگانے۔