اسلام آباد۔ 26 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ داوخت آ دنیا ٹی سلہہ غاتا جاگہ غا بیانیہ نا جنگ مننگ ءِ، ہراسٹ نا بیانیہ اخس سوگو مریک، اونا ہموخس اہمیت مریک، بیانیہ نا کمک اٹ نن تینا موقف ءِ گچین وڑاٹ پیش کننگ کینہ، 2018ء ٹی ہراتم نن اقتدار اٹ بسن تو ریاستی میڈیا نا ڈیجیٹیلائزیشن کن کاریم نا بناءِ کرین، اے پی پی ءِ جہانی خبررساں ادارہ سے نا وڑآ ڈیجیٹل نیوز ایجنسی اس جوڑ کننگ کن عملی گام گیج کننگا۔ داخیال آتا درشانی ءِ او اے پی پی نا ڈیجیٹیلائزیشن ڈٹ انا رداٹ بھرتی مروک آ کنٹریکٹ ملازم آتا درستی راستی دود آن تران کرسا کرے۔ داوخت آ منیجنگ ڈائریکٹر اے پی پی مبشر حسن، ایگزیکٹیو ڈائریکٹر عدیلہ رباب کاظمی، انفارمیشن سروسز اکیڈمی نا ڈائریکٹر جنرل سعید جاوید و اے پی پی نا سینئر آفیسر آک ہم ساڑی ئسر۔ بنجائی وزیر حوالکاری پارے کہ داسہ سلہہ غاتا جاگہ غا بیانیہ و سلاہ نا کمک اٹ جنگ کننگک، ہراسٹ نا بیانیہ اخس سوگو مریک، ہموخس اونا اہمیت مریک۔ اوپارے کہ تاریخ آن معلوم مریک کہ ہراڑے پیسہ و وسیلہ ئس ہموڑے کوزہ کننگاکہ، ہندوستان اٹی ہم ہنداوڑ مس، برطانیہ نا ایسٹ انڈیا کمپنی بس ہندوستان آ کوزہ کرے، ولدا او کمپنی ءِ پدی ہنوئی تما۔ ارٹ میکو جنگ عظیم اٹ لکھ آ مخلوق نا جانک ہنار، داجنگ آن پد جہانی کانود جوڑ مس، دنیا نا اخلاقیات بدل مس۔ اوپارے کہ سلہہ نا زور آ کروک آ روایتی جنگ انا ہیت ءِ کین تو امریکہ اوغانستان آ جلہو کرسا منہ گھنٹہ ٹی ہموڑے حکومت ءِ چٹفیسس، اوغانستان نا مچ آ کنٹرول امریکہ نا دوٹی ہناسس ولے او واک انا زور آ تینا مسخت آتے دوئی کننگ کتو انتئے کہ دنیا ٹی غلبہ دوئی کننگ نا سفت بدل مسوسس۔ سلہہ غاتا کمک اٹ جنگ ءِ کٹنگ نا جاگہ غا بیانیہ زور مس و بیانیہ نا جنگ اٹ امریکہ ءِ شکست مس و آخرکار اودے اوغانستان آن پیش تموئی تما۔ بنجائی وزیر حوالکاری پارے کہ دنیا نا بھلا جنگ آک داسہ بیانیہ آن کننگرہ، بیانیہ ٹی ہمو فریق سرسہب مریک ہرا تینا دماغ ءِ جوان کاریم اٹ اتیک، بیانیہ نا کمک اٹ نن دنیا نا مون آ تینا موقف ءِ گچین وڑاٹ پیش کننگ کینہ۔ چوہدری فواد حسین پارے کہ پاکستان تحریک انصاف نا دور اٹ اولیکو وار میرٹ آ بھرتی کننگ انگ ءِ، نن ہندن ءُ نظام اس ٹہیفنگ خوانہ ہراڑآن شفافیت نظر برے۔ اوپارے کہ ای 2016ء آن پاکستان تحریک انصاف نا ڈیجیٹل میڈیا نا باندات آتے ہراٹہ، بحیثیت سیاسی پارٹی پاکستان تحریک انصاف نا ڈیجیٹل میڈیا ریاست نا میڈیا غان زیات سوگو ئس۔ اوپارے کہ 2018 ء ٹی ہراتم نن اقتدار اٹ بسن تو نن ریاستی میڈیا ءِ ڈیجیٹل شعبہ ٹی سوگو کننگ نا بناءِ کرین۔ اے پی پی ءِ رائٹرز و اے ایف پی کون آ جہانی خبررساں ادارہ غاتا وڑآ ڈیجیٹل نیوزایجنسی اس جوڑ کننگ نا کوشست کرین، 2018ء ٹی انت اس سجفین، اینو الحمداللہ اودے پورو مرسا خننگ اُن۔ اوپارے کہ اے پی پی ءِ صحافت نا پڑاٹ پوسکن آ دور انا خواست آتے کاریم اٹ اتسا صحافی خذمت سرتننگ نا گرج ءِ۔ بنجائی وزیر حوالکاری پارے کہ 50ء و 60ء نا دہائی و اینو نا ڈیجیٹل دور انا صحافت اٹ بھلو پرخ اسے، اے پی پی ہندن ءُ کمرشل ماڈل اس تینا کے ہراڑآن وسیلہ ودی مرے تانکہ او مالی لحاظ اٹ تینا نت تیا سلنگ کے و تینا ملازم آتے زیات گچین آسودہی تننگ کے۔ اواے پی پی ٹی بھرتی مروک آ پوسکن آملازم آتے مبارکبادی ترسااومیت ظاہر کرے کہ پوسکن آ ملازم آک تینا لائخی تے کاریم اٹ اتسا ادارہ نا پین گچینی کن تینا فعال کڑد ءِ ادا کیرہ۔ بنجائی وزیر حوالکاری ساڑی حکومت نا وژن ءِ عملی دروشم اس تننگ کن سخت کوشست کننگ آ منیجنگ ڈائریکٹر اے پی پی مبشر حسن و اونا ٹیم انا خواری و کوشست آتا ستاءِ کرے۔ داوخت آ پاننگاکہ اے پی پی نا نیوز آپریشن نا ری سٹرکچرنگ و ڈیجیٹلائزیشن نا بابت 789.79 ملین روپئی نا خڑچ انا دا ڈٹ انا رداٹ بھرتی تیکن نیشنل یونیورسٹی آف سائنس اینڈ ٹیکنالوجی (نسٹ) انا کمک اٹ ٹیسٹ اس اڈہلک، بڑزکو کسبی مہارت تخوک چاہندار آک ٹیسٹ اٹ سرسہب مروک آ اومیتدار آتا انٹرویوز کرے وخت اس کہ بھرتی تا عمل ءِ شفاف کننگ کن اومیتدارآتا انٹرویونا آڈیو و ویڈیوریکارڈنگ ہم کننگا۔ ڈیجیٹل میڈیا نا خواست آتے مون آ تخسااولیکو وار ریسرچرز، سوشل میڈیا کانٹینٹ رائٹرز، گرافک ڈیزائنرز کون آ چندی آسامی تیا لائخ آ بندغ آتے بھرتی کننگا ہراڑآن ڈیجیٹل میڈیا نا پوسکن آ مہارت آتے کاریم اٹ اتسا اے پی پی پوسکن آ دور انا صحافت اٹ تینا کڑد ءِ زیات گچین وڑاٹ ادا کننگ کیک۔ داکان مست اے پی پی نا ڈیجیٹلائزیشن نا بارواٹ پریزنٹیشن تننگا ہراٹی صحافت نا بشخ اٹ اے پی پی نا کڑد و پوسکن آ دور انا خواست آتون ہم گرنچ مننگ کن کروک آ کوشست آتے تالان کننگا۔ بنجائی وزیر حوالکاری اے پی پی نا ڈیجیٹلائزیشن ڈٹ اکن بھرتی مروک آ ملازم آتیٹی سروس کارڈز ہم بشخا۔
