بیجنگ۔ 26 نومبر (اے پی پی) چین نا مسکوہی سفارت کار چن منگ منگ پارینے کہ چین جم اقتصادی شونداری نا اہم ءُ زموار اسے نا وڑاٹ انسانی وسیلہ غاتا شونداری و صنعتی شونداری ٹی پاکستان وبیلٹ اینڈ روڈ ڈٹ اناایلو ملک آتا کمک ءِ برجاتخک۔ اوبیلٹ اینڈ روڈ انیشی ایٹیو(بی آر آئی) نا رداٹ صنعتی پارک آتا تفنگ و آپریشن آ 14 دے ئی سیمینار نا اولیکو سیشن اٹ تینا بنائی ہیت آتے ٹی پارے کہ چین کسبی ہیلکاری ادارہ غاتا ٹہیفنگ نا کمک اٹ ورناتا فنی تعلیم اسکان رسینگ ءِ ودفنگ کن بی آر آئی ملک آتا کمک ءِ کننگ کن تیار ءِ۔ سیمینار اٹ چینی چاہندار صنعتی شونداری، ہیومن ریسورس ڈویلپمنٹ، زیات آن زیات شونداری کن صنعتی پارک آتا آپریشنل بست و بند آ گپ وتران کیرہ۔ اوپارے کہ پدتموک ملک آتے ٹی ورناک کسب و علم انا کمک اٹ پورو وڑاٹ واکدار افس و نئے اوفتے پوسکن آ ٹیکنالوجی نا تربیت تننگانے وخت اس کہ لائخی تے ودفنگ نا وسیلہ غاتسکان اوفتا کم رسینگ ءِ۔ ولے چین ورناتا تکنیکی تعلیم اسکان رسینگ ءِ ودفنگ کن کسبی تربیت نا ادارہ جوڑ کرسا داخلاءِ پُر کننگ کن بی آر آئی ملک آتا کمک ءِ کننگ کن تیار ءِ انتئے کہ لائخی سازی صنعتی و جم اقتصادی شونداری نا کلیت ءِ ہرا شونداری شریدار آتا نیام اٹ کمکاری نا غٹ آن اہم بشخ ءِ۔ اوپارے کہ چین اسہ پت انا قابل شونداری شریدار اسے و بشخ ہلوک آتے مشورہ ایتیوہ کہ او پائیدار شونداری کن تینا ملک آتے ٹی چاگڑد دوست توانائی نا پیدوار آ چکار تخر۔ اوقول کرے و باور کرفے کہ چین دا چرجوئی ٹی ہرکوشست نا مخ تفی ءِ کیک و چین صنعتی پارک آتا جوڑ کننگ و آپریڑنگ اٹ نم تون تفک و نن اواری اٹ تینا قوم تیکن بھاز گڑاد وئی کننگ کینہ۔ اوپارے کہ چینی کمپنیک چندی شریدار ملک آتے ٹی ہندی ورناتے صنعتی پارک آتے ٹی ملازمت ترسا تربیت تننگ ءُ۔ سیمینار نا بست و بند ءِ چین نا وزارت واپار نا ادارہ اکیڈمی فارانٹرنیشنل بزنس آفیشلز(اے آئی بی او) کریسس۔ سیمینار نا کنڈآن آن لائن ٹریننگ سیشن تیٹی پاکستان، مصر، سری لنکا، ویزویلا، ایتھوپیا و نائیجیریا غان آفیسر آک بشخ ہلکر۔
