اسلام آباد۔ 26 نومبر (اے پی پی) بنجائی وزیر مذہبی امور پیر نورالحق قادری سعودی حکومت نا کنڈآن پاکستانی مسافر آتے براہ راست سعودی عرب اٹ پترینگ انگ نا موکل ملنگ آ خادم الحرمین شریفین تون اوار سعودی حکومت نا منت واری ءِ ہرفسا پارینے کہ سعودی عرب آ ہنوک آ غٹ پاکستانی تے سعودی کمامدارآتا جوڑ کروک کورونا ایس او پی تا پابندیءِ المی کروئی مریک۔ وزارت مذہبی امور نا کنڈآن جاری بیان نا رداٹ اوپارے کہ پاکستانی مسافر آتے سعودی عرب اٹ پترینگ انگ آن پد 5 دے قرنطینہ کروئی مریک۔ اوپارے کہ پاکستانی زائر آتیکن عمرہ بحالی نا کسر ہم آوار مسنے۔ دا چرجوئی ٹی اوفتا سعودی حکومت تون گپ وتران برجاءِ۔ اوپارے کہ پاکستان تون اوار انڈونیشیا، برازیل، ویتنام ، مصر و بھارت آن ہم پابندی ءِ چٹفنگک۔ یکم دسمبر آن پابندی آ چٹفنگ نا فیصلہ نا اطلاق مریک۔ اوپارے کہ سائنو فارم و سائنو ویک ویکسین نا حامل بندغ آتے منظور مروک ویکسین نا بوسٹر شارٹ خلفوئی مریک۔ داکان بیدس سعودی کمامدارآتا جوڑ کروک ایلو کورونا ایس او پی تا پابندی المی مریک۔ اوپارے کہ پابندی نا چٹفنگ آ خادم الحرمین و شریفین نا منت واراُن، داکان بیدس سعودی وزیر جج و پاکستان اٹ سعودی عرب نا سفیر نواب سعید المالک نا ہم بطور خاص منت واری ءِ ہرفنہ۔ اوپارے کہ عمرہ زائر آتیکن 5 دے ادارتی قرنطینہ نا پابندی ءِ چٹفنگ نا ہم کوشست کینہ۔
