اسلام آباد۔ 26 نومبر (اے پی پی) یوکے پاکستان بزنس کونسل پارینے کہ قومی زرگزران نا سوگوی و برآمد آتا مون آ دننگ کن برآمدی بشخ آتے کن درآمد کروک آ خام مال آ ریگولیٹری ڈیوٹی ٹی کمتی کننگے۔ داہیت ءِ کونسل نا چیئرمین میاں کاشف اشفاق لاہور چیمبر نا کنوینر ٹریول اینڈ ٹورازم کمیٹی مجید یوسف نا کماشی ٹی برآمد کروک آتا ڈل اتون گپ وتران کرساپارے ہرا جمعہ نادے آ داڑے اوڑتون اوڑدہی کریر۔ میاں کاشف پارے کہ داوخت آ 40 درسد اسکان خام مال زیروڈیوٹی آ درآمد کننگ انگ ءِ ہرا بھاز کم ءُ انتئے کہ برآمد آتے معقول کہول آ دننگ کن درآمد مروک خام مال نا بھلو کچ اسے آ دا آسراتی دوئی مننگ المی ءِ۔ اوپارے کہ پاکستان درآمدی ریسہ غا 47 درسد ٹیکس جمع کرینے ہرا دنیا ٹی غٹ آن زیات ءِ۔ دا کچ دیکی ملک آتے ٹی پنچ درسد، ملائیشیا ٹی 10 درسد و ہندوستان و بنگلہ دیش اٹ 30 درسد آن ہم کم ءِ۔ اومستی پارے کہ نجی بشخ آتے آسودہی پیکج ترسا حکومت ءِ ایران، نیامی ایشیائی ریاست و اوغانستان تون ہڑتوم آ کنڈآتا بار ٹرٹریڈ نا مون آ دننگ ءِ ہم اہمیت تننگے۔ میاں کاشف مستی پارے کہ حکومت یورپی یونین، امریکہ و چین کون آ روایتی منڈی تیٹی پاکستان نا پورو رسینگ آ چکار تننگ تون اوار اوار سٹریٹجک ٹریڈ پالیسی فریم ورک نا رداٹ مصنوعات آتا رینج ، بشخ و جغرافیہ نا گیشتری آ ہم چکار تخے۔ سلک روٹ ری کنیکٹ پالیسی نا رداٹ نیامی ایشیائی ریاست و افریقہ ٹی غیر روایتی منڈی تا پٹنگ کن ہم اسہ قابل ءُ عمل فریم ورک اس تیار کننگے۔ سٹی لنک انا چیف ایگزیکٹیو مجید یوسف پارے کہ پاکستان ءِ صنعت آن ہلیس فیڈرل بورڈ آف ریونیو اسکان غٹ بشخ آتے ٹی ایکسپورٹ کلچر اس درستی راستی کرفنگ نا گرج ءِ و وزارت واپار اودے پک کننگ کن ہرممکن کوشست کے انتئے کہ برآمد آتا مون آ دننگ ملکی زرگزران نا سوگوی کن بھاز اہم ءِ۔ اوپارے کہ حکومت صنعت آتے گیس انا بے سلنگ آن فراوانی ءِ پک کے ہرا قومی زرگزران نا لائف لائن ءِ انتئے کہ ساڑی حالیت آتے ٹی ہرقوم انا بقا نا سیبو بیرہ سوگو زرگزران آٹی ءِ۔
