اسلام آباد۔ 25 نومبر (اے پی پی) سینزدہ می اِرادے ئی ایشیا۔یورپ سروک دیوان پنچ شنبے نادے آ کمبوڈیا ٹی بناکرے۔ وزیرخارجہ مخدوم شاہ محمود قریشی نوم۔پنہہ ٹی اڈ ہلوک 13 می ایشیایورپ ورچوئل دیوان(اسیم) اٹ پاکستانی ڈل انا کماشی ءِ کننگ ءِ۔ ایشیا۔یورپ میٹنگ، ایشیاو یورپ نا نیام اٹ اسہ غیررسمی ڈائیلاگ فورم اسے، ہرا ہڑتوم آ ڈیہہ تے مون تروک سیاسی، اقتصادی و راجی ویل آتے ایسر کننگ کن جوڑ کننگانے۔ دافورم نا بنداوی مسخت تین پہ تینی شرف و بریبر شریداری نا جوزہ غان تینا تعلقداری تے سوگو کننگ ءِ۔ دیوان اٹ، مچ آ دنیانا راہشون، موسمیاتی بدلی، پائیدار شونداری نا ہدف 2030 ناایجنڈا، آفت آتا خطرہ ٹی کمتی و اسیم نا آخبت نا اہم ویل آتیا گپ وتران کننگ ءُ۔ سروکی دیوان نا اولیکو دے، بشخ ہلوک آک موسمیاتی بدلی و قدرتی آفت آتون مون تننگ کن برجاکوشست آتا ستاءِ کرسا ایشیاو یورپ نا نیام اٹ رابطہ غاتے ودفنگ آ چکارکننگ نا گرج آ زور شاغار۔ دیوان اٹی آسیم فورم نا یکتا و غیررسمی وڑءِ برقرار تخسا آخبت نا چیلنج آتون مون تننگ کن ممکنہ حکمت عملی نا بابت ہم گپ وتران کننگا۔ تینا بیان تیٹی راہشونک ساڑی آ علاقائی و جہانی ویل آتیا تینا خیال آتا درشانی ءِ کریر۔ وزیرخارجہ مخدوم شاہ محمود قریشی ، پاکستان نا نمائندگی ءِ کرسا آسیم فورم آن تران کیک و اوغانستان تون اوار علاقائی امن و سلامتی تون تعلقدار امور آ پاکستان نانقطہ نظر ءِ پیش کیک۔
