اسلام آباد۔ 25 نومبر (اے پی پی) وزیراعظم نا سلاہکار خزانہ و محصولات شوکت فیاض ترین پاکستان اٹ واپاری و اقتصادی سرجزآتا مون آ دننگ اٹ سٹی بینک انا کڑد انا ستاءِ کرسا پارینے کہ حکومت الس نا راجی و اقتصادی شونداری کن اصلاحات نا پروگرام آ عمل کننگ ءِ۔ اوداہیت ءِ پنچ شنبے نادے آ داڑے سٹی بینک پاکستان نا ڈل اتون اوڑدہی ٹی پارے۔ ڈل انا کماشی ءِ سٹی بینک پاکستان نا صدر و کنٹری آفیسر احمد بوزائی کریکہ۔ احمد بزائی تینا ڈل انا باسک آتا سلاہکار خزانہ تون درستی راستی ءِ کرفے۔ اووزیراعظم نا سلاہکار ءِ بینک انا امور کار و سرجزآتا بارواٹ سرجمی اٹ معلومدار کرے، خاص وڑاٹ او درآمد و برآمد آتے ٹی کمکاری و آسراتی فراوان کننگ نا بابت بینک انا کڑد ءِ مون آ تخا۔ دیوان اٹی زرکاری نا رکھ ، بجٹ ءِ پک کننگ و وام تا انتظام و انصرام نا بابت چندی سلاہ تا جاچ ءِ ہم ہلنگا۔ سلاہکار خزانہ پارے کہ بینک پاکستان اٹ واپار و اقتصادی سرجزآتا مون آ دنگن اٹ اہم کڑد ادا کننگ ءِ۔ اوپارے کہ حکومت الس نا راجی و اقتصادی حالیت زار اٹ گچینی کن اصلاحات نا پروگرام آ عمل کننگ ءِ۔ وزیراعظم نا سلاہکار پارے کہ بینک پاکستان اٹ تیل و گیس، پام آئل و ایلو گڑاتا بابت اسیجائی واپاری سرجزآتے ٹی ودکی کے۔ سلاہکار خزانہ پارے کہ پاکستان نا حکومت زرکار و بزنس کمیونٹی پورو کمک و آسراتی فراوان کننگ کن سنبرینگوک ءِ۔
