بیجنگ۔ 25 نومبر (اے پی پی) چین و پاکستان نا نیام اٹ صنعتی و کشاری بشخ آتے ٹی کمکاری ءِ مون آ دننگ کن چین پاکستان اقتصادی راہداری (سی پیک) نا ارٹ میکو شونداری ریسہ ٹی ہڑتوم آ ملک آتے ٹی اولیکو کشاری معاہدہ طے مسنے ہرانا رداٹ پاکستان آن پیماز چین نا منڈی آ گدریفنگک۔ چین اٹ پاکستانی سفارت خانہ چینی اخبار گلوبل ٹائمز ءِ تروک آ اسہ بیان اسے ٹی پاننگاکہ دامعاہدہ چین نا منڈی ٹی پاکستان آن پیماز نا مصنوعات آتا رسینگ ءِ آسان کیک و پاکستان ءِ پیماز نا ہندی پیدواری لائخی ءِ گچین کننگ اٹ پین کمک ایتک۔ پاکستان اٹ چین نا سفیر نونگ رونگ پاکستان اٹ قومی غذائی رکھ و پٹ وپول نا وزارت تون پاکستان آن درآمد مروک پیماز نا معائنہ نا گرج آتے کن اسہ پروٹوکول اسے آ دستخط کننگ آن پد سفیر پارے کہ سی پیک بڑزکو آب انا شونداری نا ارٹ میکو ریسہ ٹی پترینگانے ہراٹی کشاری واپار، کولڈ چین سٹوریج و ایلو بشخ آتے ٹی سوگو ہڑتوم آ کنڈآتا کمکاری ءِ گچین کننگ تون صنعتی و کشاری کمکاری آ چکار کننگانے۔ پاکستان نا بنجائی وزیر نیشنل فوڈ سیکورٹی اینڈ ریسرچ سید فخر امام داوخت آ پارے کہ چین اسہ بھاز بھلو و پکا صارف منڈی اسے و پاکستان چین اتون کشاری کمکاری ءِ ودفنگ و چین ءِ امب ، چیری و ڈیری مصنوعات کون آ بڑزکو آب انا مصنوعات آتا برآمد آتے مون آ دننگ نا اومیت تخک۔ دامعاہدہ چین پاکستان اقتصادی راہداری (سی پیک ) نا ارٹ میکو ریسہ ٹی ہڑتوم آ ملک آتا نیام اٹ کشاری برآمد آتا بابت اولیکو معاہدہ ءِ و دا چین اٹ پاکستانی پیماز نا منڈی اسکان رسینگ نا بناءِ۔ جاچکار آک پارینو کہ دا معاہدہ سی پیک نا ارٹ میکو ریسہ نا تعمیر ءِ مون آ دننگ و کشت وکشار اٹ تین پہ تینی واپار ءِ پین سوگو کننگ اٹ کمک رسینگک۔ پاکستانی سفارت خانہ پارے کہ 2020اٹی چین پاکستان آزاد واپاری معاہدہ (سی پی ٹی اے) نا ارٹ میکو ریسہ غا عملدرآمد آن پد آن ہڑتوم آ کنڈآتا واپار اٹ پین سوگوی مسنے و پین پاکستانی مصنوعات چینی مارکیٹ اسکان سرمننگ اٹ سرسہب مسنے۔ چینی سفیر زور شاغاکہ پاکستان تون اینخو سال جنوری آن ستمبر اسکان کشاری واپار 860 ملین ڈالر اسکان سرمس، چین ءِ پاکستان نا برآمد 630 ملین ڈالر اسکان سرمس ہراکہ سال بہ سال دوگنا ودکی ءِ۔ بیرہ امب انا برآمد 37.4 ٹن اسکان سرمس ہرا 2020نا ہندا وخت انا مقابلہ ٹی 10 گنازیات ءِ۔ اوپارے کہ ہڑتوم آ ملک آتا 75 درسد مصنوعات آ محصولات 2020 آن پدریسہ صفرکننگانے، ہراپاکستان آن زیات بڑزکو آب انا کشاری مصنوعات آتے کن چین اسکان رسینگ فراوان کرینے۔
