اسلام آباد۔ 25 نومبر (اے پی پی) وزیرداخلہ شیخ رشید احمد پارینے کہ ہمسایہ دشمن پاکستان اٹ تخریب کاری نا ہچ ءُ موقع اس گوہپک، پولیس آ امن و ایمنی نا بھلو زمواری اس مریک، راج انحطاط نا گواچی ءِ چنانچہ ڈوہدار کسبی پڑک آتا زیات منظم مننگ نا سوب آن پولیس نا زمواریک پین ودانو، قوم اومیت کیک کہ پولیس الس نا خذمت کن ہروڑنا قربانی ایتک۔ پنچ شنبے نادے آ داڑے نیشنل پولیس اکیڈمی ٹی اے ایس پیز نا پاسنگ آؤٹ پریڈ نا دود آن تران کرسا وزیرداخلہ شیخ رشید احمد پارے کہ پولیس خواری، و ہمت اٹ تینا فرض ءِ پورو کننگ ءِ، بدبختی اٹ نن پولیس ءِ ہمو ہند ءِ تتنون ہرانا او حقدار ءِ۔ اوپارے کہ اینو نا دور اٹ میڈیا بھاز واکدار ءِ، ہربندغ نا جیب اٹ اِرااِراکیمرہ ءُ، پولیس اگہ زمواری اٹ تینا کاریم ءِ کیک تو اونا ستاءِ کننگے ولے عام مشاہدہ دادے کہ اگہ بھلو بندغ اسے نا گاڈی ءِ تورسا پولیس کارندہ اونا چالان ءِ کننگ خوائے تو اوڑتون جھگڑا کننگک و الٹا پولیس ءِ بدنام کننگ کن ویڈیوءِ وائر ل کننگک۔ وزیرداخلہ پارے کہ پولیس آفیسر و ورناک دے ونن الس نا خذمت ءِ کننگ ءُ، پولیس 7 ہزار جان تا قربانی تسنے، اینو نا حالیت آتے ٹی پولیس نا کاریم پین مشکل مسنے، 78 کالعدم تنظیم و اوفتا سلیپرسیلز ءُ، نن تینا جغرافیائی محل و وقوع و ہمسایہ نا حالیت آتیان ہم زہمی مرینہ و ننا ظاہری و اودیم دشمن پاکستان اٹ تخریب کاری نا ہچ ءُ موقع اس گوہپک، نفسا نفسی نا دور ءِ، میڈیا واکدار ءِ، داوڑاٹ پولیس نا زمواریک پین ودرہ۔ وزیرداخلہ پولیس ءِ پارت کرے کہ او الس تون گچین رابطہ اس جوڑ کیر ، ہنداوڑ امن و ایمنی نا حالیت ہم گچین مریک و پولیس نا شرف ہم ودک۔ شیخ رشید احمد پولیس نا کارکڑد ءِ خراج تحسین پیش کرسا پولیس نا تنخواہ و آسودہی تے ودفنگ نا گرج آ زور شاغا۔ اوپارے کہ راج دادنگ آ سرمسنے کہ الس ہرویل انا ایسر ءِ پولیس آن خواہک، داوڑاٹ پولیس کن چیلنج زیات سخت و مشکل ءِ، ڈوہ ءِ گرج آن زیات پبلسٹی ملنگ ءِ، ڈوہدار پڑک زیات منظم و متحرک ءِ۔ اودامچ آ حالیت آتے ٹی تینا زمواری تے پورو کروک آ پولیس آفیسر وورناتا خذمت آتا ستاءِ کرے۔ وزیرداخلہ 47 می ایس ٹی پی نا پاسنگ آؤٹ پریڈ اٹ شریک اے ایس پی تے مبارکبادی ترسا دااومیت نا درشانی ءِ کرے کہ او قوم انا اومیت آتیا پورو سلک و امن و ایمنی ، اسلام و الس نا خذمت کن ہروڑنا قربانی ایتک۔
