اسلام آباد۔ 25 نومبر (اے پی پی) وزیرخارجہ مخدوم شاہ محمود قریشی تون امریکی ڈیموکریٹ راہشون طاہر جاوید پنچ شنبے نادے آ وزارت خارجہ ٹی اوڑدہی کرے۔ پاک امریکہ بزنس فورم نا چیئرمین حفیظ خان ہم اوڑتون اوار ئسک۔ اوڑدہی ٹی پاکستان و امریکہ نا نیام اٹ ہڑتوم آ کنڈآتا تعلقداری، زرگزرانی سفارت کاری تون اوار تین پہ تینی است خواہی نا امور آ گپ وتران کننگا۔ وزیرخارجہ پارے کہ پاکستان، امریکہ تون ہڑتوم آ کنڈآتا تعلقداری تے خاص اہمیت ایتک، ننا حکومت، زرگزرانی اولیت آتیا چکار کرینے۔ شاہ محمود قریشی پارے کہ پاکستان، پیشن نا زرکارآتے ، پاکستان اٹ زرکاری کن، ای ویزہ تون اوار کیہی اہم آسراتی فراوان کننگ ءِ۔ امریکی کمپنی دا آسودہی تیان فائدہ ہرفسا پاکستان نا چندی بشخ آتے ٹی زرکاری کرسا گچین منافع اس کٹیا کننگ کیک۔ اوڑدہی ٹی امریکہ ٹی رہینگوک آ پاکستانی تابابت ہم خصوصی گپ وتران کننگا۔ وزیرخارجہ امریکہ ٹی رہینگوک آ پاکستانی کمیونٹی کن ڈیموکریٹک راہشون طاہر جاوید نا خذمت آتا ستاءِ کرے۔ طاہرجاوید وزیرخارجہ مخدوم شاہ محمود قریشی نا منت واری ءِ ہرفسا ، اودے پاکستان و امریکہ نا نیام اٹ اقتصادی کمکاری ءِ مون آ دننگ کن پبی کوشست آتے کاریم اٹ اتنگ نا باورکرفے۔
