اسلام آباد۔ 25 نومبر (اے پی پی) وزیراعظم عمران خان جہانی کمپنی تے پاکستان اٹ تینا کاروبار اس جوڑ کننگ نا سلہ ءِ خلسا پارینے کہ پاکستانی ورناتیٹی بے پناہ لائخی ارے، آئی ٹی و ٹیلی کام کمپنی پاکستانی ورناتا تربیت اتون اوار اوار ٹیکنالوجی ءِ ہم گدریفر۔ داخیال آتا درشانی ءِ او ملٹی نیشنل ٹیلی کمیونیکیشن سروسز کمپنی (وی آن) نا پڑک چیف ایگزیکٹیو آفیسر کان ترزیوگلو تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ وزیراعظم آفس نا میڈیا ونگ آن جاری بیان نا رداٹ وزیراعظم پارے کہ پاکستان نا ورناک انفارمیشن ٹیکنالوجی و ٹیلی کام نا پنی آ جہانی کمپنی تیان بھاز فائدہ ہرفنگ کیرہ۔ پاکستانی ورناتیٹی بے پناہ لائخی ارے و نن پاکستان اٹ کاروبار اس جوڑ کننگ کن جہانی کمپنی تے بخیر اٹ پانہ۔ وزیراعظم ٹیکنالوجی نا گدریفنگ و ورناتا تربیت آ زور شاغا۔ وی آن نا سی ای او بگ ڈیٹا سلوشنز نا بابت تینا است خواہی نا درشانی ءِ کرے۔ سلاہکار خزانہ شوکت فیاض ترین، چیئرمین پی ٹی اے میجر جنرل (ر) عامر عظیم باجوہ، جاز انا سی ای او عامر ابراہیم ئسک ہم اوڑدہی ٹی ساڑی ئسر۔
