اسلام آباد۔ 24 نومبر (اے پی پی) صدر مملکت ڈاکٹر عارف علوی پارینے کہ اسلام امن، ایلمی و رواداری نا رغامک، بین المذاہب ہم آہنگی کن نن خواجہ صلی اللہ علیہ و آلہ وسلم نا رغاموک آتیا بایدے عمل کین، قائد اعظم محمد علی جناح مذہبی ہم آہنگی نا زبردست قائل ئس و پاکستان نا جوڑ مننگ آن پد ہم او ملک اٹ مسلمان و ایلو مذہب آتا نیام اٹ ہم آہنگی و اوفتے بریبر نا حق تننگ نا پرچار کرے۔ صدر مملکت داخیال آتا درشانی ءِ چارشنبے نادے آ داڑے اسہ دےئی جہانی بین المذاہب امن کانفرنس آن تران کرسا کرے۔ کانفرنس نا بست وبند ءِ بین المذاہب کونسل امن و یکجہتی پاکستان وزارت مذہبی امور نا شریداری اٹ کریسس۔ کانفرنس آن وزیر مملکت پارلیمانی امور انجینئر علی محمد خان، اسلامی نظریاتی کونسل نا چیئرمین ڈاکٹر قبلہ ایاز، مرکزی رویت ہلال کمیٹی نا چیئرمین مولانا سید ناسید عبدالخبیر آزاد، یورپی یونین نا سفیر اندرولا کیموناراو ایلو شخصیت آک تران کریر۔ ڈاکٹر عارف علوی پارے کہ دنیا نا غٹ مذہب آک مخلوق نا نیام اٹ امن و مذہبی ہم آہنگی نا سبخ ایترہ، خواجہ نبی کریم صلی اللہ علیہ و آلہ وسلم نا وڑوڈول ننکن کسرنا ڈیواءِ ہرافتے خلفائے راشدین ئسک ہم برجاتخار۔ صدر مملکت پارے کہ اسلام مذہبی خارانا سخت برخلاف ءِ، بھارت اٹ مسلمان تا تاریخ ءِ مسخ کرسا اوفتا برخلاف ظلم و بیدادی مننگ ءِ و مسلمان تا برخلاف کانود جوڑ کننگ انگ ءِ۔ اوپارے کہ پاکستان مذہبی ہم آہنگی کن کرتارپورراہداری ءِ ملانے۔ صدر مملکت ڈاکٹر عارف علوی پارے کہ بین المذاہب ہم آہنگی کانفرنس آن تران اوڑکن شرفمندی نا سوب ءِ۔ اورویت ہلال کمیٹی نا چیئرمین مولانا سید عبدالخبیر آزاد و اونا رفیق آتے مبارکباد ترسا پارے کہ اونا باوہ ایماندار عبدالکبیر آزاد نا بین المذاہب ہم آہنگی ٹی پبی کڑدمسنے و او چندی مذہب و مکاتب فکر انا مخلوق ءِ اسٹ کننگ نا کوشست کرینے۔ صدر پارے کہ دنیا ءِ جوان ءُ سرکڑدہ غاتا گرج ءِ، مذہب، رنگ و نسل نا بنداو آ خارتا پداٹ استحصال نا نظریہ ءِ ، انسانی استحصال بایدے بند مرے۔ کانفرنس اٹ چندی مذہب آتیان تعلق تخوک آ مذہبی راہشون، چندی مکاتب فکر آن تعلق تخوک آ دینی شخصیت، اسکالر و ایلو نمائندہ غاک بھلو کچ اسے ٹی بشخ ہلکر۔
