اسلام آباد۔ 24 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ اسلام و خواجہ نبی کریم صلی اللہ علیہ و آلہ وسلم نا پن آ بایدے سیاست مف، اسلام ننے امن نا سبخ ایتک، بین المذاہب ہم آہنگی پرامن دنیا کن المی ءِ، خواجہ نبی کریم صلی اللہ علیہ و آلہ وسلم رحمت اللعالمین ءِ، وزیراعظم عمران خان رسول صلی اللہ علیہ و آلہ وسلم نا سُچا ءُ عاشق اسے، حکومت اسلاموفوبیا نا بابت جہانی کہول آ توار بڑز کرے۔ داہیت ءِ او چارشنبے نادے آ داڑے جہانی بین المذاہب امن کانفرنس آن تران کرساپارے۔ بنجائی وزیر حوالکاری پارے کہ داتاثر غلط ءِ کہ اسلام تلوار آن تالان مس، صوفیک ننے اسلام نا عظیم مذہب آن روشناس کرفیر۔ اوپارے کہ اسلام ننے امن نا سبخ ایتک، بین المذاہب ہم آہنگی پرامن دنیا کن المی ءِ۔ اوپارے کہ سیاست اٹ ہرگڑاءِ مسخ کرسا پیش کننگک، ننا داڑے ہم داوڑنا ویل ارے، اسلام و خواجہ نبی کریم صلی اللہ علیہ و آلہ وسلم نا پن آ بایدے سیاست مف۔ چوہدری فواد حسین پارے کہ داکان بھلو ظلم اس ہچ ءُ مننگ کپک کہ سرکار دوعالم صلی اللہ علیہ وآلہ وسلم نا پن ءِ چنکا چنکاجند انا فائدہ غاتے کاریم اٹ اتنگے۔ اوپارے کہ مذہب نا پن آ شدت پسندی ءِ مسترد کننگ ننا فرض ءِ، دارداٹ عالم دینک قومی کہول آ تیناکڑد ءِ ادا کیر، پیشن نا سوب آتیا ہیت کننگ حکومت نا کاریم ءِ۔ اوبین المذاہب امن کانفرنس نا اڈتننگ آ وزارت مذہبی امور و ایلو منتظمین آتے مبارکباد پیش کرے۔
