اسلام آباد۔ 24 نومبر (اے پی پی) پاکستان اٹ یورپی یونین نا سفیر اینڈرولاکامینارا پارینے کہ ای ایف پی اکنامک کونسل نا پاکستان نا سافٹ دروشم ءِ تالان کننگ اٹ کڑد ستاکڑزک، آئی ایل اولیبر آب آتا عمل آن پاکستان ءِ 2024 آن جی ایس پی پلس اسٹیٹس اٹ کمک رسینگک۔ اوپارے کہ نجی بشخ انا نمائندہ تنظیم تا فعال کوشست جہانی مارکیٹ اٹ پائیدار ساڑی گری ءِ پک کننگ و داڑتون اوار اوار علاقائی بلاکس یا انفرادی ملک آتا کنڈآن تروک آ واپاری آسراتی تا زیات آن زیات فائدہ ہرفنگ کن اہم ءِ۔ ایمپلائرز فیڈریشن آف پاکستان (ای ایف پی) نا اکنامک کونسل نا مثبت گام گیج سفت نا قابل ءِ۔ داہیت ءِ او ای ایف پی اکنامک کونسل نا دورہ نا وخت آ تین پہ تینی است خواہی نا چندی امور آ گپ وتران کرسا پارے۔ یواین گلوبل کومپیکٹ نیٹ ورک پاکستان نا صدر مجید عزیز، ای ایف پی اکنامک کونسل نا چیئرمین آصف زبیری، سینئر ایڈوائزر یونس ڈھاگا، انگرڈکر سٹینسن و صغیر بخاری آئی ایل او لیبر اسٹینڈرڈز ، ویب کوپ، جی ایس پی پلس، الیکٹر سٹی مارکیٹ، منرل ٹو کیمیکل، ایس ڈی جی ایس و ایلو تعلقدار سرحال آتا چندی پہلو تیا سرجمی اٹ گپ و تران کریر۔ ای ایف پی نا کنڈآن جاری بیان نا رداٹ یورپی یونین نا سفیر خاص وڑاٹ یورپی یونین نا جی ایس پی پلس نا اہمیت آ چکار کرسا داہیت انا ستاءِ کرے کہ ای ایف پی انٹرنیشنل لیبرآرگنائزیشن(آئی ایل او) نا بطور جزو پاکستان نا سافٹ دروشم ءِ تالان کننگ و آئی ایل او نا لیبر آب آتا عمل اٹ پاکستانی برآمد کروک آتا کوشست آتے مون آدرے۔ اوداعملی گام گیج آتا خاص وڑاٹ ستاءِ کرے ہرا ای ایف پی اکنامک کونسل جی ایس پی پلس، منرلز ٹو کیمیکل، لک افریقہ، الیکٹرسٹی مارکیٹس، ٹورازم و زالبول آتے واکدار کننگ نا بابت کرینے۔ اوداحقیقت آ ہم مثبت ورندی تس کہ اقوام متحدہ نا گلوبل کومپیکٹ نیٹ ورک پاکستان اٹ ای ایف پی نا چھتری نا کیرغ خذمت فراوان کننگ ءِ۔ اومشورہ تس کہ مزور آتون اوار اوار حکومت و چائلڈ لیبر نا چٹفنگ کن سنجیدگی اٹ سجفنگے تانکہ لیبر انسپکشن ءِ پک کننگ کن اسہ وڑوڈول اس ٹہیفنگ مرے و کارندہ غاتے آئی ایل او نا فریڈم آف ایسوسی ایشن کنونشن نا رداٹ یونین جوڑ کننگ نا قابل کننگ مرے۔ اوداباورہم کرفے کہ داوڑنا کوشست آتیان پاکستان ءِ جنوری 2004آن بروک آ یورپی یونین جی ایس پی پلس اسٹیٹس تننگ نا مقدمہ پیش کننگ اٹ کمک رسینگک۔ اینڈرولاکامینارا داہیت انا ہم ستاءِ کرے کہ ای ایف پی اکنامک کونسل نا ریسرچ ڈیپارٹمنٹ پورو وڑاٹ زالبول آتیا تالان ءِو اقتصادی کونسل نا چندی گام گیج آتیا گچین پریزنٹیشن تیار کننگ آ زالبول پولکارآتا ہم ستاءِ کرے۔ اوریسرچ ٹیم ءِ مشورہ تس کہ او ای ایف پی نا آؤٹ پٹ و آئیڈیاتے ودفنگ اٹ کمک کن تینٹ ہم کوشست کیر انتئے کہ دا جہانی فورم تیا پاکستان کن خاص وڑاٹ زالبول آتے واکدار کننگ و واپار و صنعتی شونداری نا پروگرام تا بابت حیران کن کڑد ادا کننگ کیرہ۔ ای ایف پی نا صدر اسماعیل ستار پارے کہ یورپی یونین تون خڑکی کمکاری مون آ ہِننگ نا عملی گام اسے۔ پاکستان ءِ بھلو وخت اسے آن جہانی اسٹیک ہولڈرآتیان پدی سلنگ نا ویل مون تروک ءِ و داسہ وخت بسنے کہ ای ایف پی یورپی یونین نا ڈل آتون ہم کوپہ کاریم کے۔ یورپی یونین پاکستان نا غٹ آن اہم واپاری پارٹنر ءِ ہرا 2020اٹی پاکستان نا جم واپار نا 14.3 درسد نا شریدار ءِ و پاکستان نا جم برآمد آتا28 درسد بشخ درآمد کننگ ءِ۔ یورپی یونین اٹ پاکستانی برآمد آتے ٹیکسٹائل و لویس آتا بشخ زیات ءِ و 2020اٹی یورپی یونین ءِ پاکستان نا جم برآمد آتا 75.2 درسد بشخ دوئی کننگانے۔ اوپارے کہ تعلقدار جہانی اسٹیک ہولڈر آتے کن پین مصروفیت تخنگ المی ءِ انتئے کہ پاکستان داسہ جہانی برادری ٹی غٹ آن مون آٹے۔
