اسلام آباد۔ 24 نومبر (اے پی پی) برجامالی سال اٹی انفارمیشن ٹیکنالوجی (آئی ٹی ) سیکٹر اٹ کروک آ براہ راست درملکی زرکاری (ایف ڈی آئی) نا کچ اٹ 381 درسد ودکی مسنے۔ اسٹیٹ بینک انا حساب وکتاب نا رداٹ اینخو مالی سال انا بنائی چار تُو اٹی جولائی آن اکتوبر 2021اٹی آئی ٹی سیکٹر اٹی 70.7 ملین ڈالر نا ایف ڈی آئی کننگانے وخت اس کہ تدوک آ مالی سال انا ہند اوخت اٹی جولائی آن اکتوبر 2020اٹی شعبہ ٹی 14.7 ملین ڈالر نا براہ راست درملکی زرکاری کننگاسس۔ ہنداوڑ تدوک آ مالی سال انا مقابلہ ٹی برجامالی سال انا اولیکو 4 تُو اٹی آئی ٹی سیکٹر اٹ کروک آ ایف ڈی آئی ٹی 56 ملین ڈالر یعنی 381 درسد نا نمان ودکی ریکارڈ کننگانے۔ ایس بی پی نا رداٹ تدوک آ مالی سال انا مقابلہ ٹی اینخو مالی سال اٹی آئی ٹی سروسز نا بشخ اٹی کروک آ ایف ڈی آئی نا کچ 315 درسد نا نمان ودکی آن جولائی آن اکتوبر 2020نا 12.2 ملین ڈالر زرکاری نا مقابلہ ٹی جولائی آن اکتوبر 2021اٹی 50.6 ملین ڈالر اسکان ودا۔ داوخت آ ایف ڈی آئی نا کچ اٹی 38.4 ملین ڈالر نا نمان ودکی ریکارڈ کننگانے۔
