اسلام آباد۔ 23 نومبر (اے پی پی) وزیراعظم عمران خان پارینے کہ حکومت ملک اٹ اقتصادی سرجزآتے مون آ ودفنگ کن اولیتی بنداو تیا گام گیج کننگ ءِ، سی پیک فیز 2 آ کاریم نا رفتار ءِ پین ترند کننگ کن حکومت گام گیج کننگ ءِ، برآمدی صنعت اٹ زرکاری ءِ ودفنگ آن روزگار نا وارخواہی ودی مننگ ءِ۔ داخیال آتا درشانی ءِ او سے شنبے نادے آ تینا کماشی ٹی اولیتی بشخ آتا جاچ دیوان آن تران کرسا کرے۔ دیوان اٹی بنجائی وزیر اسدعمر، حماد اظہر، سلاہکار شوکت فیاض ترین، معید یوسف، خصوصی کمکار ڈاکٹر شہبازگل، چیئرمین سی پیک خالد منصور، چیئرمین زرکاری بورڈ اظفراحسن و تعلقدار بڑزکو آفیسر آک ساڑی ئسر۔ دیوان اٹی وزیراعظم پارے کہ حکومت ملک اٹی اقتصادی سرجزآتے ودفنگ کن اولیتی بنداو تیا گام گیج کننگ ءِ۔ برآمدی صنعت اٹ زرکاری ءِ ودفنگ آن روزگار نا وارخواہی ودی مننگ ءِ۔ اوپارے کہ زرکارآتے فائدہ ئی چاگڑداسے نا فراوانی کن غٹ حکومتی ادارہ غاک اواری اٹ کاریم کننگ ءُ۔ سی پیک فیز 2 آ کاریم نا رفتار ءِ پین ترند کننگ کن حکومت گام گیج کننگ ءِ۔ دیوان اٹی چین پاکستان اقتصادی راہداری (سی پیک) نا فیز 2 آ پیش رفت آ سرجم حوال تننگا۔ دیوان ءِ پاننگاکہ رشکئی، دھابیجی، علامہ اقبال و بوستان خصوصی صنعتی زون تیٹی گیس و بجلی نا فراوانی آ کاریم ترندی اٹ برجاءِ۔ بنداوی وڑاٹ صنعت آتا تفنگ کن درکار بجلی و گیس دوئی ءِ وخت اس کہ صنعت آتے ٹی زرکاری تون اوار اوار ایلو درکار بجلی و گیس انا فراوانی ہم کننگک۔ داچرجوئی ٹی سی پیک اتھارٹی نا کنڈآن پلگ اینڈ پلے ماڈل نا سلاہ ءِ پیش کننگا ہراڑآ کاریم برجاءِ۔ ماڈل نا رداٹ زرکارآتا غٹ تر گرج آتے ون ونڈو آپریشن نا کمک اٹ پورو کرسا دا علاقہ غاتے ٹی صنعت آتا تفنگ اٹ ترندی ءِ پک کننگک، داڑتون اوار اوار زرکارآتے صنعت آتا تفنگ ، چندی ادارہ غاتیان درکار منظوری و ایلو اہم معلومداری تا فراوانی کن زرکاری بورڈ انا کنڈآن پورٹل آ ہم کاریم کم و ود پورو مسنے ہرانا زوت بناءِ کننگک۔ دیوان ءِ پاننگاکہ سی پیک نا رداٹ ڈٹ آتا پیش رفت نا جاچ ءِ ہلنگ و شونداری کاریم تا رفتار ءِ ودفنگ کن باقاعدہ سسٹم نا بناءِ کننگانے۔ برآمدی بشخ و صنعت آتا پیدواری ءِ کرسا ایس ای زیز اٹ زرکاری ءِ ودفنگ کن گام گیج کننگ انگ ءِ۔ کشاری بشخ اٹ نئے بیرہ کارپوریٹ فارمنگ آ کاریم ترندی اٹ برجاءِ، بلکن بشخ انا برآمد آتے ودفنگ کن معاہدہ ہم کننگ انگ ءِ ۔ دیوان اٹ وزیراعظم سی پیک فیز 2 اتون تعلقدار غٹ گام گیج آتے معینہ مد اٹ پورو کننگ نا پارت جاری کرے۔
