اسلام آباد۔ 23 نومبر (اے پی پی) وزیراعظم عمران خان پارینے کہ کچٹی نا ویل انا مون ءِ توننگ کن پائیدار چاگڑدی رکھ ڈٹ وخت انا اہم ءُ گرج اسے۔ داخیال آتا درشانی ءِ او ملک اٹ کچٹی نا بابت ویل آتا بابت اڈ ہلوک دیوان نا کماشی ءِ کرسا کرے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم تعلقدار محکمہ غاتے پارت کرے کہ او ملک انا بھلا شار تے کچٹی آن بچفنگ کن صوبائی حکومت آتون اواری اٹ حکمت عملی اس جوڑ کیر و داچرجوئی ٹی دمدستی وڑاٹ غٹ المی گام گیج کننگے۔ وزیراعظم پارے کہ ساف ستھرا و کچٹی آن پاک پاکستان ننا اولیت ءِ۔ چاگڑدی بدلی تون تعلقدار ویل آتا ایسری کن پائیدار بنداو تیا گام گیج بایدے کننگے۔ وزیراعظم پارے کہ بھلو کچ اسے آ شارتیٹی شجرکاری نا کمک اٹ حکومت زیات آن زیات نیال خلنگ آ پبی چکار تخنگ ءِ۔ دیوان اٹ بنجائی وزیر حوالکاری و شینکاری چوہدری فواد حسین ، وزیراعظم نا خصوصی کمکار چاگڑدی بدلی ملک امین اسلم، خصوصی کمکار ڈاکٹر شہبازگل و ایلو سینئرکمامدارآک بشخ ہلکر وخت اس کہ چیف سیکرٹری پنجاب، سینئر ممبر بورڈ آف ریونیو بابرحیات تارڑویڈیو لنک انا کمک اٹ بشخ ہلکر۔
