اسلام آباد۔ 23 نومبر (اے پی پی) سلاہکار قومی سلامتی ڈاکٹر معید یوسف پارینے کہ وزیراعظم عمران خان نا کماشی ٹی پاکستان نا اولیت جیو پولیٹکس آن جیو اکنامکس اٹ بدل مسنے ہنداخاطرآن پاکستان امریکہ تون اقتصادی شریداری و زرکاری نا خواہندار ءِ۔ اوداخیال آتا درشانی ءِ داڑے امریکی ایوان نمائندگان نا باسک گریگوری میکس نا کماشی ٹی شش باسکی امریکی ڈل اتون اوڑدہی ٹی کرے۔ اوڑدہی ٹی اوغانستان نا حالیت آتون اوار پاک امریکہ ہڑتوم آ کنڈآتا تعلقداری آ گپ وتران کننگا۔ داوخت آ تران کرسا ڈاکٹر معید یوسف پارے کہ پاکستان اقتصادی سیکورٹی ماڈل نا رداٹ دنیا تون شریداری کرسا تینا جیواکنامک پوزیشن نا فائدہ ہرفنگ آ چکار کرینے۔ اومستی پارے کہ پاکستان اٹ سرسہب کاروبار کروک آ امریکی کمپنیک ہڑتوم آ ملک آتا گچین فائدہ ٹی ءُ۔ ڈاکٹر معید یوسف اوغانستان اٹی بگڑینگوک آ انسانی حالیت آتیا گڑتی نا درشانی ءِ کرے انتئے کہ کم و ود 60 درسد اوغان آبادی ءِ غذائی کاختی نا خلیس ءِ۔ اوپارے کہ دنیا ءِ اسہ ہندن ءُ گچین ءُ نظام اس جوڑ کننگ نا گرج ءِ ہرانا کمک اٹ اوغان نرینہ، نیاڑی و چناتسکان یخ انا موسم نا شدت آن مست امداد سرمننگ کے۔ ڈاکٹر معید یوسف مستی پارے کہ اوغانستان اٹ مالیاتی و بینکنگ نا نظام درہم برہم ءِ۔ ملک اٹ نظام نا بھسکاری ءِ توننگ کن دا ویل ءِ زوت ایسر کننگے۔ ہڑتوم آ کنڈآک تین پہ تینی است خواہی نا غٹ بشخ آتے ٹی مثبت کنڈآ ہِننگ آ امنا کریر۔
