اسلام آباد۔ 23 نومبر (اے پی پی) پاکستان فروری 2019اٹی آزاد کشمیر اٹی بھارتی پائلٹ نا دزگیری آن مست پاکستانی ایف شانزدہ جہاز ءِ خلنگ و بِٹنگ نا بابت بے بنداو بھارتی دعویٰ تے مسترد کرسا پارینے کہ نرزوری نا خیالی کارنامہ غاتیا فوجی اعزاز تننگ فوجی طرزعمل نا ہراصول آتیان چپ ءِ۔ داوڑنا ایوارڈ تننگ آن بھارت بیرہ تینے آ تینٹ ملنڈ خلکونے۔ پاکستان دشمنی نا عزم ءِ بے سہب کننگ کن پورو تیار و سنبرینگوک ءِ۔ بھارت پاکستان نا وتواجہی ناخلاف ورزی ءِ کننگ نا تینا بے سہب کوشست آتیان سبخ اس ہلے۔ سے شنبے نادے آ ترجمان دفترخارجہ فروری 2019اٹی آزاد کشمیر اٹی دزگیر بھارتی پائلٹ ءِ نئی دہلی حکومت نا کنڈآن نرزوری نا ایوارڈ تننگ آ سخت ردعمل نا درشانی ءِ کرسا پارینے کہ جہاز ءِ خلنگ و بِٹنگ والا بھارتی پائلٹ ءِ ایوارڈ تننگ بھارتی دروغ انا کلاسیک کیس و ہندی مخلوق ءِ است جم کننگ و شرمندگی ءِ ڈکھنگ کن خالص ملنڈی ءُ کِسہ اسے۔ ترجمان پارے کہ جہانی ماہرین و امریکی کمامدارآک مہالوآن پک کرینو کہ پاکستانی ایف شانزدہ جہاز آتا جاچ ءِ ہلنگ آن پد دادے آ اسہ ہم پاکستانی ایف شانزدہ جہاز اسے خلنگتنے۔ ترجمان پارے کہ بھارت اسہ ہندن ءُ دروغ اسے تالان کننگ ءِ ہرا بھاز ملنڈی ،، بے ہودہ و پورو وڑاٹ بے نقاب مسنے۔ ترجمان پارے کہ نرزوری نا خیالی کارنامہ غاتیا فوجی اعزاز تنگ فوجی طرز عمل نا ہراصول آتیان چپ وخت اس کہ خیالی کارنامہ غاتیا داوڑنا ایوارڈ ترسا بھارت تینے آ تینٹ ملنڈ خلکونے۔ یات سلے کہ 27 فروری 2019آ پاکستانی فضائیہ دے انا روشنائی ٹی اِرا بھارتی جہاز ءِ خلسا بٹیسس۔ اوفتیان اسہ بھارتی مگ 21 بائیسن جہاز آزاد کشمیر اٹ تماسس۔ پیراشوٹ نا کمک اٹ تینے خسوک آ بھارتی پائلٹ ءِ پاکستان دزگیر کریسس و اوکان پد جوزہ خیرسگالی نا وڑاٹ یلہ کرے۔ اوفتا ہندوستان آ واپسی بھارت نا دشمنی و جارحانہ عزم آن پد ہم پاکستان نا امن نا است خواہی نا شاہدی ئس۔ پاک فضائیہ ہندادے آ اسہ پین بھارتی جہاز ایس یو 30 ءِ خلسا بٹیسس ہرا ایل او سی نا ایلو کنڈآ تما۔ ہندادےآ، ہبکئی ٹی ، بھارتی فوج سری نگر نا خڑک تینا ہی ایم آئی 17 ہیلی کاپٹر ءِ خلسا بٹے ہرانا ابتداٹی تردید ءِ کننگا، اوکان پد اودے امنا کننگا۔ ترجمان پارے کہ اسہ ہیت اس پیدوار ءِ کہ بھارت نا مضحکہ خیز کِسہ نا جہانی برادری نا مون آ ہچ ءُ حیثیت اس اف۔
