اسلام آباد۔ 23 نومبر (اے پی پی) پاکستان تحریک انصاف نا حکومت چین پاکستان اقتصادی راہداری( سی پیک) ءِ اولیت آتے ٹی اوار تخسا ڈٹ انا ارٹ میکو ریسہ ءِ سرسہبی اتون بناکرینے ہراڑآن ملک اٹ روزگار نا پوسکن ءُ وارخواہی و جی ڈی پی ءِ نمو ٹی ودکی مننگ تون اوار اوار ہڑتوم آ کنڈآتا صنعتی کمکاری آن پاکستان ڈیہہ ٹی پیدواری مرکز اس جوڑ مریک، سی پیک نا رداٹ علامہ اقبال انڈسٹریل فیصل آباد زون(فیڈمک) اٹ داتم اسکان 845 ملین ڈالر نا چینی زرکاری مسنے۔ سی پیک اتھارٹی کمامدارآتارداٹ صنعتی زون تا جوڑ کننگ آن ہندی صنعت کار آتے کن زرکاری نا بے شمار وارخواہی ودی مریک۔ چینی صنعت آتا پاکستان اٹ گدریفنگ آن روزگار نا پوسکن ءُ وارخواہی، چندی بشخ آتے ٹی معلومداری نا ہل و تس و مہارت اٹ ودکی مریک۔ پاکستان سی پیک نا رداٹ شونداری و شونہالی نا سفر ءِ ترندی اٹ مون آ دننگ کن پورو وڑاٹ سنبرینگوک ءِو سی پیک ءِ ہڑتوم آ کنڈآتا واپار و کمکاری کن رکھ ءُ کسر اس جوڑ کننگ ءِ، فیڈمک زون اٹ داتم اسکان 845 ملین ڈالر نا چینی زرکاری بسنے، ڈٹ آتیان ہندی مخلوق ءِ روزگار نا وارخواہی ہم دوئی مسنے۔ کمامدارآتارداٹ چینی کمپنی فیبریکیٹڈ اُراتا ٹیکنالوجی اس ایسنے، 5 مرلہ نا اُرا کم و ود 40 لکھ روپئی آن 40 دے اٹی تیار مریک۔ ملک اٹی بھاز زوت الیکٹرک گاڈیک بھلو کچ اسے ٹی مون آ بریرہ، 5 ایکڑ ڈغار آ فیکٹری جوڑ کرینے و کم و ود چین نا سیرامکس نا کمپنی ٹائل آتا تیاری کن زرکاری کننگ ءِ، 135 ایکڑڈغار آ 300 ملین ڈالر نا زرکاری کننگ ءِ۔ کمامدارآتارداٹ چین کشت وکشار نا بشخ اٹ ہم نمان شون ہلکونے وخت اس کہ پاکستان کشت وکشار نا بشخ اٹ داسکان ہمو خاص ہند ءِ دوئی کننگ کتنے ہرا اسہ کشاری ملک اس مننگ نا حیثیت اٹ پاکستان ءِ دوئی کروئی ئسک۔ پاکستان کشاری بشخ اٹ چین نا آزموندہ غاتیان پبی فائدہ ہرفنگ خواہک تانکہ کشاری پیدوار ءِ ودفنگ مرے۔ کشت و کشار نا شونداری کن چین نا کمپنیک جوجک کسفوک دوائی تا تیار کننگ کن زرکاری کننگ ءُ۔ کمامدار آتا پاننگ ءِ کہ سی پیک فیز ٹو اٹی اسپیشل اکنامک زون تیا چکار تخسا زرکارآتے آسراتی کن ہرممکن گام گیج کننگ انگ ءِ، پاکستان چینی زرکارآتون براہ راست رابطہ کیک داڑکن ون ونڈو آپریشن نا بناءِ کننگ انگ ءِ، چنکا نجی چینی کمپنیک الیکٹرانک، ٹیکسٹائل، تعمیراتی گڑا و آٹو سیکٹر اٹ کاریم کننگ ءُ۔ بروک آ ریسہ ٹی ہڑتوم آ ملک گوادر پورٹ ءِ شون تننگ، انڈسٹریل پارکس، کشت وکشار، سائنس و ٹیکنالوجی پین پین کن گام گیج آتیا چکار تخرہ۔
