شکست نا جشن کننگ و ابھینندن ہرا دے ویر چکر تننگ بیرہ مودی کننگ کیک، وزیر مملکت حوالکاری و شینکاری فرخ حبیب

اسلام آباد۔ 23 نومبر (اے پی پی) وزیر مملکت حوالکاری و شینکاری فرخ حبیب پارینے کہ شکست نا جشن کننگ و ابھینندن ءِ ویر چکر تننگ بیرہ مودی کننگ کیک۔ سے شنبے نادے آ تینا ٹویٹ اٹی وزیر مملکت 27 فروری 2019 آ پاک فضائیہ نا شاہین تا شست مروک آ بھارتی مگ جہاز نا پائلٹ ابھینندن ءِ بھارت نا مسٹ میکو غٹ آن بھلا فوجی اعزاز تننگ نا دود اسے نا ویڈیو ءِ شیئرکرسا پارے کہ شکست نا جشن کننگ و ابھینندن ءِ ویر چکر تننگ بیرہ نریندر مودی کننگ کیک۔ اوبھارتی وزیراعظم ءِ مشورہ تس کہ او آمخ آتا جنت اٹ تینا قیام ءِ برجاتخے۔ یات سلے کہ بھارتی صدر رام ناتھ کووند دوشنبے نادے آابھینندن ءِ فروری 2019اٹی مبینہ وڑاٹ پاکستانی فضائیہ نا ایف 16 جہاز خلنگ بِٹنگ آ ’’ویرچکر‘‘ اس تسنے۔ پاکستان کیہی وار دا بھارتی دعویٰ نا تردید کرینے و امریکی جریدہ فارن پالیسی تینا رپورٹ اٹ پاریسس کہ امریکہ نا محکمہ دفاع نا کارندہ غاک پاکستانی ایف۔16 جہاز آتا حساب ءِ کرینے و او کچ اٹ پورو ءُ۔ امریکی کمامدارآتا کنڈآن دابیان دا بھارتی دعویٰ ءِ پورووڑاٹ دروغ ثابت کریسس۔