اسلام آباد۔ 23 نومبر (اے پی پی) برجامالی سال اٹی ٹیکسٹائل نا برآمد آتے ٹی 26.55 درسد ودکی مسنے۔ ادارہ شماریات پاکستان (پی بی ایس) نا رپورٹ نا رداٹ جولائی آن اکتوبر 2021اٹی برآمد آتا مالیت 6021.815 ملین ڈالر اسکان ودا وخت اس کہ تدوک آ مالی سال اٹی جولائی آن اکتوبر 2020اٹی ٹیکسٹائل نا برآمد آتیان 4758.473 ملین ڈالر زرمبادلہ کٹیا کننگاسس۔ ہنداوڑ تدوک آ مالی سال انا مقابلہ ٹی اینخو مالی سال انا اولیکو چار تُو اٹی ٹیکسٹائلز نا قومی برآمد آتے ٹی 1263.342 ملین ڈالر یعنی 27 درسد نا نمان ودکی ریکارڈ کننگانے۔ بی پی ایس نا رداٹ اینخو مالی سال اٹی سوتی دسک انا برآمد آک 71.39 درسد ودکی آن 230.329 ملین ڈالر نا مقابلہ ٹی 394.765 ملین ڈالر اسکان ودار۔ ہندا وڑ سوتی پچ انا برآمد آتے ٹی ہم 18.54 درسد، نیٹ ویئر نا برآمد آتے ٹی 34.45 درسد، بیڈویئرز نا برآمد آتے ٹی 21.30 درسد و توال آتا برآمد آتے ٹی 14.17 درسد ودکی مسنے۔ داکان بیدس ریڈی میڈ گارمنٹس آتا برآمد آتے ٹی ہم 22.34 درسد ودکی ریکارڈ کننگانے۔ ایلو کنڈآ خام روئی نا برآمد آتے ٹی 100 درسد کمتی، تمبو و ترپال آتا برآمد آتے ٹی 23.98 درسد کمتی واقع مسنے۔
