اسلام آباد۔ 23 نومبر (اے پی پی) شنگھائی ٹی پاکستان نا قونصل جنرل حسین حیدر پارینے کہ تدوک آ مسہ سہ ماہی ٹی چین ءِ پاکستانی برآمد آتے ٹی 76 درسد ودکی مسنے۔ پاکستان نا برآمد کروک آتا چین نا بھلا درآمدی منڈی آن فائدہ ہرفنگ نا رداٹ برآمد آتے ٹی خاطر خواہ ودکی ءِ پک کننگ مریک۔ چائنہ اکنامک نیٹ (سی ای این) تون گپ وتران کرسا حسین حیدر پارے کہ کورونا نا جہانی دین آن پد ہم اینخو سال انا اولیکو نہہ تُو اٹی چین پاکستان آجو واپاری معاہدہ نا سوب چین ءِ کروک آ قومی برآمد آک 76 درسد ودانو۔ اوگمان ظاہر کرے کہ اینخو سال برآمد آتا کچ 3 ارب ڈالر آن گدرینگک ہرا چین ءِ کروک آ غٹ آن زیات برآمد آک مریرہ۔ قونصل جنرل پاکستانی برآمد کروک آتیا زور شاغا کہ چین نا بھلا درآمدی منڈی نا گرج آتا رداٹ مصنوعات آتا تیاری آ خاص چکار تخر و پوسکن آ منڈی تسکان رسینگ نا گام گیج آتے ہم ودفر ہراڑآن پاکستانی برآمد آتے ٹی خاطر خواہ ودکی ءِ پک کننگ اٹ کمک دوئی مریک۔ اوپارے کہ سی پیک نا ارٹ میکو ریسہ ٹی پاکستانی الس نا زند انا آب اٹ گچینی آ چکار کننگ انگ ءِ و داٹی پاکستان اٹی کشاری و کسبی تربیت نا مون آد ننگ آن کشاری بشخ انا برآمد آتے ٹی ودکی مریک۔ اوپارے کہ پاکستان و چین کشاری و کسبی تعلیم و تربیت نا مون آ دننگ نا بابت جامع حکمت عملی نا رداٹ شریداری ءِ مون آ دننگ ءُ۔
