پاکستان و امریکہ نا پارلیمانی رابطہ غاتے ٹی ودکی ہڑتوم آ کنڈآتا تعلقداری تے پین سوگو کننگ اٹ اہم ءُ کڑد اس ادا کننگ کیک، اسپیکر قومی اسمبلی اسد قیصر نا امریکی کانگریس نا ڈل اتون گپ وتران

اسلام آباد۔ 22 نومبر (اے پی پی) اسپیکر قومی اسمبلی اسد قیصر تون دوشنبے نادے آ امریکی کانگرس نا ڈل کانگرس نا امور خارجہ کمیٹی نا چیئرمین گریگری میکس نا کماشی ٹی اوڑدہی کرے ہراٹی ہڑتوم آ کنڈآتا تعلقداری، ڈیہہ نا حالیت و تین پہ تینی است خواہی نا امور آ گپ وتران کننگا۔ اسپیکر ڈل اتون گپ وتران کرسا پارے کہ ہڑتوم آ ملک آتے ٹی پارلیمانی کہول آ رابطہ غاتے ٹی ودکی ہڑتوم آ کنڈآتا تعلقداری تے پین سوگو کننگ اٹ اہم ءُ کڑد اس ادا کننگ کیک۔ ہڑتوم آ ملک آتے ٹی جمہوریت نا بالادستی، کانود نا حکمرانی و انصاف نا فراوانی اسیجائی قدر ءِ۔ اوپارے کہ امریکہ ٹی رہینگوک 1 ملین آن زیات پاکستان پردیسیک ہڑتوم آ ملک آتا نیام اٹ پول انا کڑد ءِ ادا کننگ ءُ۔ امریکہ پاکستان اٹ انفراسٹریکچر نا شونداری، زرکاری ایلو اہم بشخ آتے ٹی شریدار ءِ۔ ڈیہہ ٹی پائیدار امن کن ہڑتوم آ ملک آتے ٹی رابطہ غاتا مون آ دننگ المی ءِ ، اسد قیصر پارے کہ ساڑی آ پارلیمان اٹ زالبول، چنا ، خصوصی بندغ و راج انا پسماندہ تپہ غاتا حق انا رکھ اکن کانود سازی کننگانے۔ پاکستان اٹ سلاہ درشانی نا پورو آجوئی ءِ و ساڑی ٹی پارلیمان صحافی تا رکھ انا بل ءِ منظور کرینے۔ اوغانستان اٹی امریکی پیش تمنگ آن پد زرگزرانی تنکی ودی مننگ ءِ دا تنکی نا وخت آ مون ءِ توننگ المی ءِ۔ امریکی ڈل انا سروک پارے کہ امریکہ پاکستان تون تینا تعلقداری تے بھاز اہمیت ایتک و ہڑتوم آ کنڈآتا کمکاری ٹی مون آ دننگ نا کمک اٹ اوفتے پین سوگو کننگ نا خواہندار ءِ۔ ہڑتوم آ ملک آتا پارلیمان تا پارلیمنٹ نا باسک آتا ڈل انا ہن و بر آن ہم آہنگی ءِ مون آ دننگ دوئی مریک۔ پاکستان نا پارلیمان نا کنڈآن زالبول، چنا و صحافی برادری نا حق انا رکھ اکن کروک آ کانود سازی ستاکڑزک۔ پاکستان ڈیہہ نا اہم ءُ ملک اسے و ڈیہہ ٹی پائیدار امن کن پاکستان نا کڑد بھاز اہمیت تخک۔ امریکہ ٹی رہینگوک پاکستانی پردیسیک امریکہ نا شونداری و شونہالی ٹی اہم ءُ کڑد اس ادا کننگ ءُ۔