اسلام آباد۔ 22 نومبر (اے پی پی) پاکستان و جہانی مالیاتی فنڈ (آئی ایم ایف) توسیعی سہولت فنڈ انا رداٹ پالیسی و اصلاحات نا شش میکو جاچ انا بابت اسٹاف معاہدہ غا امنا کرینو اوکان پد پاکستان ءِ پین اسہ ارب، 5 کروڑ ، 90 لکھ ڈالر نا کمک ملنگ تون اوار اوار کثیر الجہتی و ہڑتوم آ کنڈآتا شریدار آتیان چندی ڈٹ آتے کن فنڈ انا فراوانی نا کسرآک آوار مسنو۔ جہانی مالیاتی فنڈ (آئی ایم ایف ) نا کنڈآن جاری مروک بیان اسے ٹی پاننگانے کہ پاکستانی کمامدار وآئی ایم ایف توسیعی سہولت فنڈ انا رداٹ پالیسی و اصلاحات نا شش میکو جاچ انا بابت اسٹاف معاہدہ غا امنا کرینو۔ تدوک آ گام گیج خاص وڑاٹ زری و ادارہ جاتی اصلاحات نا نفاذ نا حالیت اٹ آئی ایم ایف نا انتظامی بورڈ معاہدہ ءِ پک کیک۔ جاچ انا پوروی نا حالیت اٹ پاکستان ءِ پین 1.059 ارب ڈالر نا کمک ملک اوکان پد توسیعی سہولت فنڈ انا رداٹ پاکستان ءِ ملوک آ جم کمکاری 3.027 ارب ڈالر مریک۔ داکان بیدس پاکستان ءِ ہڑتوم آ کنڈآتا و کثیر الجہتی شریدار آتیان پین فنڈز انا فراوانی نا کسر آوارمریک۔ کورونا دین انا جہانی دین اتون مون تننگ کن پاکستان ءِ اپریل 2020اٹی 1.015ارب ڈالر نا ودکی کمک ہم فراوان کننگاسس۔ جہانی مالیاتی فنڈ انا کنڈآن جاری بیان اٹ پاننگانے کہ ہیت وگپ اٹ مشکل چاگڑد آن پد ہم توسیعی سہولت فنڈ(ای ایف ایف) نا کمک اٹ چلینگوک آ پروگرام نا نفاذ اٹ پیش رفت برجاءِ۔ جون انا ایسر کن پرائمری نسخان ءِ ہسلا مقداری کارکڑد نا غٹ آب آتے گیشتر مارجن تون پورو کننگا۔ ڈھانچہ جاتی پڑ آ ذکر انا قابل سرسہبی تیٹی نیشنل سوشل اکنامک رجسٹری(این ایس ای آر) اپ ڈیٹ ءِ حتمی دروشم اس تننگ، نیشنل الیکٹرک پاور ریگولیٹری اتھارٹی(نیپرا) ایکٹ اٹ ترمیم نا پارلیمان آن منظوری، غٹ زیر التوا سہ ماہی پاور ٹیرف ایڈجسٹمنٹ نا نوٹیفکیشن ، و آئی پی پیز آتے اولیکو ادائیگی اوار ءِ۔ بیان اٹ پاننگانے کہ پاکستان منی لانڈرنگ نا برخلاف گام گیج و کانود ءِ گچین کننگ و دہشت گردی نا مالی اعانت نا توننگ نا فریم ورک اٹ ہم پیش رفت کرینے۔ بیان اٹ پاننگانے کہ کلی زرگزران نا بابت دوئی حساب وکتاب آن پاکستان اٹ سوگو زرگزرانی بحالی نا عکاسی مننگ ءِ۔ پاکستان کوویڈ۔ 19 تون مون تننگ کن کثیر الجہتی پالیسی اس اختیار کرے ہراڑآن دین انا انسان و زرگزران آ تموک آ منفی اثرآتا مون ءِ توننگ اٹ کمک ملا۔ فیڈرل بورڈ آف ریونیو (ایف بی آر) نا کنڈآن خراج و کٹیا تیٹی گچین نمو مس، بیان اٹ پاننگانے کہ حسابات جاریہ نا کھاتہ غاتے ٹی نسخان و کرنسی نا قدر اٹی کمتی نا زور بنداوی وڑاٹ سوگو زرگزرانی سرگرمی، توسیعی میکرواکنامک پالیسی مکس، و اجناس نا بڑزکو جہانی نہاد آتا مرکب اثرآتا عکاسی ءِ کیک۔ داحالیت آتون مون تننگ کن پاکستان نا کمامدارآک پالیسی تے ایڈجسٹ کننگ نابناءِ کرینو۔ اسٹیٹ بینک آف پاکستان زری پالیسی ٹی بدل کرینے۔ صارف آتا وام تا نمو ءِ توننگ کن گام گیج کننگا۔ پاکستان نا حکومت مالیاتی گام گیج آتا اسہ پیکج اس درستی راستی کرفنگ نا ارادہ ہم تخک ہرانا رداٹ تدوک آ مالی سال انا بابت بنداوی نسخان نا چنکو کمتی اسے ہدف جوڑ کننگک۔ خراج نا نظام ءِ آسان و منصفانہ جوڑ کننگ کن گام گیج کننگک ہراٹی جی ایس ٹی نظام اٹ اصلاحات ہم اوار ءِ، راجی رکھ اکن خڑچ آتے پک کرسا کفایت شعاری آن خڑچ آتے پک کننگک۔ جہانی مالیاتی فنڈ انا رداٹ داپالیسی تیان نیام مدتی منظرنامہ ٹی گچینی بریک و داڑآن مالی سال 2022 ٹی نمو 4 درسد و اوکان پد انا مالی سال اٹی 4.5درسد اسکان سرمننگ یا اوکان زیات مننگ نا گمان ءِ۔ ولے افراط زر انا کچ بڑز سلک۔ برآمد آتے ٹی نمو آن پد ہم اینخو مالی سال اٹی کرنٹ اکاؤنٹ گیشتر مننگ نا گمان ءِ، ہرا ودوک آ درآمدی خواست و جہانی اجناس نا نہاد آتا عکاسی ءِ کننگ ءِ۔
