کوئٹہ۔ 22 نومبر (اے پی پی) وزیراعلیٰ بلوچستان میر عبدالقدوس بزنجو مستونگ نا علاقہ ٹی ابابکی قبیلہ نا سروک و سیاسی راہشون سردار زادہ میر محمد خان ابابکی و اونا سنگت آتا خون آ است ہسونی نا درشانی ءِ کرینے۔ وزیراعلیٰ سیکرٹریٹ آن جاری پریس ریلیز نا رداٹ وزیراعلیٰ پولیس و انتظامیہ ءِ دہشت گردی نا دا کارروائی ٹی اوار زموارآتا دزگیری کن ہرممکن گام گیج نا پارت کرینے، وزیراعلیٰ واقعہ نا پس پردہ سوب آتا جاچ ءِ ہلنگ نا پارت ہم کرینے تانکہ دوبہ دار آتسکان سرمننگ اٹ کمک ملنگ کے۔ وزیراعلیٰ پارے کہ قبائلی جھیڑہ غاک ہم امن اٹ اسہ بھلو اڑاند اسے ءُ۔ گرج داہیت انا ءِ کہ دیرپا امن کن قبائلی جھیڑہ و ایسر نا چاری ویل آتے صوبہ نا دیرینہ روایت آتا رداٹ ایسر کننگے ہراڑکن ہموغٹ سرکڑدہ قبائلی سرکڑدہ غاتیان خواست کینہ کہ او تینا سرگرم و متحرک کڑد ادا کیر۔ وزیراعلیٰ باور کرفے کہ صوبائی حکومت ہم قبائلی جھیڑہ غاتا ایسر اٹ تینا کڑد ءِ ادا کننگ کن تیار ءِ۔ وزیراعلیٰ کہوک آتا خاہوت آتون ہڑزخواہی و ہمدردی نا درشانی ءِ کرسا کہوک آتا بخشش و خاہوت کن صبر و جمیل نا دعا کرے۔
