راولپنڈی۔ 22 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ ملک انا آخبت طالب علم و یونیورسٹی تا دوٹی ءِ، طالب علم و یونیورسٹیک ملک انا تقدیر ءِ بدل کننگ کیرہ، امریکہ نا اسٹینفورڈ یونیورسٹی مسہ ٹریلین ڈالر نا اکانومی اس بڑزکرے، یونیورسٹی تا وائس چانسلرآک ملکی شونداری کن ہدف مقرر کیر، پاکستان کشاری برآمد آتا اسہ بھلو ذریعہ اس جوڑ مننگ کیک، ماڈرن ایگریکلچر اٹی بھلو وارخواہی اس ارے، طالب علم آک تینا کمپنی ٹہیفسا بزغرآتے لائیو اسٹاک تون اوار سمارٹ فارمننگ اٹ کمک فراوان کننگ کیرہ۔ داخیال آتا درشانی ءِ او دوشنبے نادے آ داڑے پیر مہر علی شاہ بارانی یونیورسٹی ٹی طالب علم آتیان تران کرسا کرے۔ بنجائی وزیر حوالکاری چوہدری فواد حسین پارے کہ پاکستان نا آخبت طالب علم و یونیورسٹی تا دوٹی ءِ، طالب علم و یونیورسٹیک ملک انا تقدیر ءِ بدل کننگ کیرہ۔ اوپارے کہ ورناک آئی ٹی ٹی انقلاب اس برپاکریر، واٹس ایپ، یاہو، فیس بک و ایمازون نا بانی ہم ورناک ئسر، امریکہ نا اسٹینفورڈ یونیورسٹی مسہ بلین ڈالر نا اکانومی اس بڑزکرے۔ بنجائی وزیر حوالکاری پارے کہ یونیورسٹی تا وائس چانسلر آک ملکی شونداری ٹی بشخ ہلنگ کن تینا ہدف اس مقرر کیر۔ اوپارے کہ پاکستان نا جوڑ مننگ نا وخت بیرہ اسہ یونیورسٹی اس ئس، داسہ 200 یونیورسٹی ساڑی ءُ، ملتان، فیصل آباد، ٹنڈوآدم، لسبیلہ تون اوار راولپنڈی ٹی جوڑ کشاری یونیورسٹیک شاندار کاریم کننگ ءُ۔ اوپارے کہ یونیورسٹی و نجی کاروباری ادارہ غاتے ٹی بایدے رابطہ مرے۔ بنجائی وزیر حوالکاری پارے کہ دا ہیت ستاکڑزک کہ بھلو کچ اسے ٹی طالب علم آک کشاری یونیورسٹی تیٹی ساڑی ءُ۔ اوپارے کہ طالب علم آتے ملک انا زرگزرانی شونداری ٹی بشخ ہلوئی ءِ ۔ چوہدری فواد حسین پارے کہ پاکستان کشاری برآمد آتا اسہ بھلو سورس اس جوڑ مننگ کیک، پوسکن آ کشت وکشار اٹ بھاز انگا وارخواہی ارے۔ طالب علم آک داوارخواہی تیان فائدہ ہرفر۔ دامسخت کن طالب علم آک تینا کمپنی اس ٹہیفر ہرا بزغرآتے لائیو اسٹاک تون اوار سمارٹ فارمنگ اٹ کمک فراوان کننگ کیر۔ بنجائی وزیر حوالکاری پارے کہ پاکستان اٹ کووڈ نا اولیکو کیس ہراتم مون آ بس تو اووخت آ نن کوویڈ نا بابت ہچ ءُ گڑاس تیار کتونہ۔ ماسک، وینٹی لیٹرز و کوویڈ نا رکھی کٹ درآمد کننگاکہ، ننا داڑے سینی ٹائزر نا کمتی مس دُن تو نن ایتھانول برآمد کرینہ ہنداخاطرآن نن ڈریپ انا ایتھانول آ پابندی ءِ چٹفین و بیرہ ہفت تُو انا چنکووخت اسے ٹی پاکستان کوویڈ نا بابت گڑاتے ہندی کہول آ تیار کننگ نا بناءِ کرے۔ اوپارے کہ اسلام آباد ءِ دنیا ٹی یکتا ءُ ہند اس دوئی ءِ، دنیا نا 63 درسد آبادی اسلام آباد آن بیرہ مسہ گھنٹہ نا مسافت آ ٹو۔ اوطالب علم آتے مشورہ تس کہ او یونیورسٹی نا نصاب تون اوار اوار دنیا ٹی مروک آ پوسکن آ ریسرچ نا ہم مطالعہ ءِ کیر۔
