جہلم ۔ 20 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ موسمیاتی بدلی اسہ ملک اسے نا آخا بلکن مچ آ دنیا نا ویل ءِ، وزیراعظم عمران خان خیبرپختونخوا آن بلین ٹری سونامی پروگرام نا بناءِ کرے، لیڈر ہمو مریک ہرا گچین کاری تا آخا ، تینا بروک آ چین نا سجفک، وزیراعظم مدام چاگڑد نا گچینی و تینا بروک آ چین تا آخبت ءِ رکھ کننگ نا ہیت ءِ کرینے، مستین اٹ کس اس ہم ملک اٹ چاگڑد نا گچینی نا سجفتویسس۔ اینو 25 ہزار ایکڑ ڈغار آ20 ہزار نیال خلنگک، جہلم اٹی دہ ءُ نیم ہزار ایکڑڈغار جنگل کن جتا کرینن۔ وزیراعظم عمران خان جہلم تا للہ ڈوئل کیرج وے نا ساڑی ٹی بنداو ءِ تخانے، انشاء اللہ بروک آ سال داجاگہ نا الس نا آسراتی کن ڈوئل کیرج وے پورو مریک، جلال پور کینال ڈٹ ترندی اٹ برجاءِ ، اسہ لکھ 78 ہزار ایکڑ ڈغار سیراب مریک، اینو ننا بزغرآتے تینا فصل آتا پورو نہاد ملنگ ءِ، کشاری زرگزران اٹ گچینی بسنے ، ننا صںعت آک شون ہلنگ ءُ۔ داخیال آتا درشانی ءِ او ہفتہ نادے آ داڑے بجوالہ فاریسٹ، ضلع جہلم اٹی وزیراعظم نا بلین ٹرین سونامی پروگرام نا رداٹ میگا پلانٹیشن ڈے انا بابت دود آن تران کرسا کرے۔ دود اٹی بلغاریہ نا سفیر، ضلعی انتظامیہ، ڈپٹی کمشنر جہلم، میڈیا نمائندہ، جہلم پریس کلب نا عہدیدار ،جہلم نا غیرت مند آ الس و اسکول آتا چناک ساڑی ئسر۔ بنجائی وزیر حوالکاری کپارے کہ پاکستان اٹ اسٹ اس ہم چاگڑد نا گچینی نا باروٹ سجفتنے، وزیراعظم عمران خان اسٹ انگا راہشون ءِ ہراخیبرپختونخوا آن بلین ٹری سونامی پروگرام نا بناءِ کرے، وزیراعظم سوغند ہرفنگ آن پد غٹ آن مست دہ ارب درخت خلنگ نا ڈٹ انا پڑو ءِ کرے۔
