اسلام آباد۔ 19 نومبر (اے پی پی) وزیراعظم عمران خان پارینے کہ حکومت ملک اٹ لس بندغ ءِ اُرا نا آسراتی فراوان کننگ کن ہنکینی ڈٹ آتیا کاریم نابناءِ کرینے، داوخت آ اسہ لکھ اُرا تفنگ انگ ءُ، بینک آک اُراتا تفنگ کن 24 ارب روپئی نا وام تسنو، مستین اٹ اسہ حکومت اس ہم لس بندغ ءِ اُرانا آسراتی فراوان کننگ نا سجفتو، ننے انفراسٹرکچر جوڑ کننگ اٹ 2 سال لگا، داسہ بھاز ترندی اٹ دا ڈٹ آ کاریم مریک۔ داخیال آتا درشانی ءِ او جمعہ نادے آ فراش ٹاؤن اٹی 4400 اپارٹمنٹ آتا تفنگ نا ڈٹ انا معائنہ ٹی کرے۔ دا ڈٹ انا بنداو ءِ اینخو سال اپریل اٹ تخنگاسس۔ وزیراعظم پارے کہ مستین اٹ اسہ حکومت اس ہم کم کٹیا و تنخواہ دار تپہ غاتے ہنکینی آسراتی تا فراوانی نا سجفتو۔ اوفتا دا اولیت الوکہ، ہنداخاطرآن بیرہ پیسہ والاک تینا اُراتے جوڑ کننگ کریرہ۔ لس بندغ کن دااسہ تغ اس ئس۔ نن اقتدار اٹ بننگ آن پد کم کٹیا والا بندغ آتے ہنکینی آسراتی تا فراوانی نا ڈٹ آتا پڑو ءِ کرین و انفراسٹرکچر ڈویلپ کننگ نا کوشست کرین انتئے کہ مستین اٹ انفراسٹرکچر ساڑی الوکہ۔ بینک لس بندغ ءِ اُراتا تفنگ کن وام تتوکہ۔ ننے 2 سال کانود جوڑ کننگ اٹ لگا۔ داسہ بینک آک لس بندغ ءِ اُرانا جوڑ کننگ کن وام تننگ نا بناءِ کرینو۔ اوپارے کہ بھارت اٹ 10 درسد، ملائیشیا ٹی 30 درسد و دیکی ملک آتے ٹی 80 درسد اُرا بینک آتیان وام ہلسا تفنگک وخت اس کہ اوکان چپ پاکستان اٹ 2018 ٹی دا کچ بیرہ 0.2 درسد ئس۔ حکومت کم کٹیا والا تپہ غاتے کن بینک آتیان وام تا بناءِ کرفے۔ ہاؤسنگ نا بشخ ءِ آسراتی تسن۔ ون ونڈو آپریشن نابناءِ کرین تانکہ لس بندغ ءِ آسانی اٹ وام ملنگ کے۔ داکان بیدس حکومت ہاؤسنگ نا بشخ اٹ سبڈیز نا پڑو کرے۔ پنچ مرلہ نا اُراکن اول پنچ سال 5 درسد سبسڈی تننگ نا فیصلہ کرے، شیفکو تپہ ءِ سروس چارج آ 2 درسد سبسڈی تس و اولیکو پنچ سال 10 مرلہ نا اُراکن 7 درسد مارک اپ نا پڑو کرے۔ حکومت 35 ارب روپئی سبسڈیز کن تخا۔ اول اسہ لکھ اُراتا تفنگ کن 3 لکھ فی اُرا سبسڈی کن تخا۔ یعنی اگہ 25 لکھ انا جوڑ مسکہ تو حکومت 3 لکھ روپئی نا سبسڈی ایتک ہراڑآن وام تا قسط کم مریک۔ حکومت نا کوشست ءِ کہ اسہ لس بندغ ہراپیسہ غاتے تینا اُرانا کِرا نا مد اٹ ایتک کم وود ہموخس زر او اُرانا قسط انا دروشم اٹ ترسا اُرانا مالک جوڑ مریک۔ حکومت تعمیراتی خڑچ ءِ کم کننگ کن ہم بھاز انگا آسراتی تس و 90 درسد خراج ءِ کم کرے۔ وزیراعظم پارے کہ داوخت آ اسہ لکھ اُرا و اپارٹمنٹ تفنگ انگ ءُ۔ بینک آتون 226 ارب روپئی نا وام تیکن 61 ہزار درخواست ساڑی ءُ وخت اس کہ اُراتا تفنگ کن 90 ارب روپئی نا وام تا درخواست منظور مسنے، بینک داتم اسکان 24 ارب روپئی فراوان کرینو۔ وزیراعظم پارے کہ فراش ٹاؤن اٹ 670 کنال ڈغارآ 4400 اپارٹمنٹس آتا تفنگ برجاءِ۔ دافتیان 2000 اپارٹمنٹ کم کٹیا والا تپہ غاتے کن ءُ۔ 400 اپارٹمنٹ کچہ آبادی ٹی رہینگوک آ مخلوق آتے کن جتا کننگانے۔ 2 ہزار اپارٹمنٹس مڈل انکم و تنخواہ دار تپہ غاتے تننگ انگ ءِ۔ داڑآ 15.3 ارب روپئی خڑچ بریک۔ وزیراعظم ڈٹ آ ترندی اٹ کاریم کننگ آ ایف ڈبلیو او، سی ڈی اے و پوسکن آ پاکستان ہاؤسنگ اتھارٹی ءِ خراج تحسین پیش کرے و پارے کہ اولیکو اِرا سال انتئے کہ انفراسٹرکچر جوڑ کننگ اٹ لگا ولے داسہ انفراسٹرکچر جوڑ مسنے ہنداخاطرآن ایلو اُرا ک بھاز ترندی اٹ تفنگرہ۔
