اسلام آباد۔ 19 نومبر (اے پی پی) وزیر پارلیمانی امور علی محمد خان پارینے کہ پنجاب و خیبرپختونخوا ٹی درمان نا مفت آسراتی کن ہیلتھ کارڈ اسکیم نا بناءِ کننگانے، سندھ حکومت ہم کمک کے و سیاست ءِ نیام اٹ اتپ تانکہ سندھ انا شاری تے ہم درمان نا مفت آسراتی ملنگ کے۔ جمعہ نادے آ بڑزکو ایوان نا دیوان اٹی وقفہ سوج آتے ٹی سینیٹر سیمی ایزدی، سیف اللہ ابڑو نا سوج آتا ورندی ٹی اوپارے کہ ساڑی حکومت الس ءِ مفت درمان نا آسراتی فراوان کننگ کن ہیلتھ کارڈ اسکیم نا بناءِ کرینے و 10 لکھ روپئی اسکان مفت درمان نا آسراتی اونا کمک اٹ دوئی کننگ مریک، داسبہ جغر و بِک آتا پیوندکاری نا آسراتی ہم تننگ انگ ءِ، پنجاب و خیبرپختونخواہ ٹی ہیلتھ کارڈ سسٹم رائج مسنے، بلوچستان نا الس ہم دااسکیم آن فائدہ ہرفک، سندھ حکومت ءِ ہم مرے کہ او داٹی کمک کے و سیاست ءِ نیام اٹ اتپ تانکہ سندھ انا مخلوق ءِ ہم مفت درمان نا آسراتی ملنگ کے، اوپارے کہ نجی ہسپتال آتیٹی درمان کرفوک آتیان معاوضہ نا ویل ساڑی ءِ، دامعاوضہ بایدے اسہ وڑ مرے، گڑاس نجی ہسپتال مخلوق نا ناجوڑی تا ناروا فائدہ ہرفرہ۔
