اسلام آباد۔ 10 اپریل (اے پی پی) سیمنٹ نا صنعت اٹی 2.5 ارب ڈالر نا پین زرکاری کننگ انگ ئِ ہراڑآن سیمنٹ تیار کروک آ ہندی صنعت نا پیداوار اٹی 60 درسد ودکی مریک۔ خیبر پختونخوا نا حکومت صوبہ ٹی کانڑ کنی کن 14 کمپنی تے لیسن جاری کرینے ہراڑآن ملک اٹی سیمنٹ نا صنعت نا شونداری و مون آ دننگ اٹی کمک رسینگک۔ کے پی کے محکمہ معدنیات و کانڑ کنی نا رپورٹ نا رداٹ حکومت صوبہ ٹی سیمنٹ نا صنعت آتا اڈتننگ و مست آن ساڑی صنعت آتا پیداواری کچ اٹی ودکی کن لیسن جاری کرینے ہرانا رداٹ صنعت اٹی 2.5 ارب ڈالر نا پین زرکاری کننگک۔ رپورٹ نا رداٹ سیمنٹ تیار کروک آ ہندی صنعت نا پیداواری کچ 45ملین ٹن آن زیات ئِ و پوسکن آ زرکاری آن پد صنعت نا جم اٹنگا پیداواری کچ اٹی پین 60 درسد نا ودکی مریک و اومیت ئِ کہ سیمنٹ تیار کروک آ ہندی صنعت نا جم اٹنگا پیداوار اٹی 30 ملین ٹن اسکان ودکی کننگ مریک۔ صنعتی چاہندار تا پاننگ ئِ کہ سیمنٹ نا پلانٹ خلنگ اٹی اوسطاََ مسہ سال انا وخت درکار مریک ، داوڑلسین نا جاری کننگ آن بروک آ مسہ سال اٹی سیمنٹ نا ملکی پیداوار اٹی 30 ملین ٹن اسکان ودکی کننگ مریک ہراڑآن نئے بیرہ سیمنٹ نا ہندی گرج آتا پوروی بلکن گرج آن زیات سیمنٹ نا برآمد آتیان نہادی زرمبادلہ کٹیا کننگ اٹی ہم کمک رسینگک۔
