اسلام آباد۔ 19 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ ٹیکنالوجی نا دور اٹی بیانیہ نا جنگ سلہہ غاتے اٹ کروک آ جنگ انا جاگہ ءِ ہلکونے، پروپیگنڈا نا مقابلہ ءِ کننگ مچ آ دنیا کن بھلو چیلنج اسے، گڑاس ملک و پڑک تینا مخالف آتے بدنام کننگ کن میڈیا ءِ ازباب نا وڑاٹ کاریم اٹ اتیرہ، اقوام متحدہ میڈیا غا جعلی خبر و خارتس مواد آتے توننگ کن فریم ورک اس تیار کے۔ داخیال آتا درشانی ءِ او پاکستان اٹی ہولی سی (ویٹیکن سٹی ) نا سفیر کرسٹوب ال کاسیس تون اوڑدہی ٹی گپ وتران کرسا کرے۔ بنجائی وزیر حوالکاری پارے کہ پاکستان و ہولی سی (ویٹیکن سٹی ) جعلی خبر و خارتس مواد آتا چٹفنگ کن اواری اٹ کاریم کننگ کیرہ۔ اوپارے کہ پاکستان و ویٹیکن سٹی ءِ اسہ ایلو نا دودوربیدگی و مذہبی قدر انا بارواٹ آگاہی دوئی کننگ نا گرج ءِ۔ چوہدری فواد حسین پارے کہ مستین اٹ رابطہ کن ٹیکنالوجی نا کمتی ئس ولے داسہ حالیت آک بدل مسنو، خبرآک ترندی اٹ تالان مریرہ، پروپیگنڈا نا مقابلہ ءِ کننگ مچ آ دنیا کن بھلو چیلنج اسے۔ اوپارے کہ حکومت آک مرکزی دنگ انا میڈیا غا خارتس مواد آتے کنٹرول کننگ کیرہ ولے کالعدم تنظیم تا کنڈآن سوشل میڈیا ءِ کاریم اٹ اتنگ انگ ءِ۔ چوہدری فواد حسین پارے کہ وزارت حوالکاری و شینکاری بین المذاہب ہم آہنگی و امن نا مون آ دننگ کن کاریم کننگ ءُ۔ اوپارے کہ پاکستان اٹ سکھ مذہب نا بانی بابا گرونانک نا ودی دے انا دود آک برجا ءُ، قومی ٹی وی چینل آ بابا گرونانک نا زند و رغاموک آتیا خصوصی پروگرام نشر کننگ انگ ءِ ، ویٹیکن سٹی نا سفیر دنیاٹی امن ءِ پک کننگ کن چندی مذہب آتا پیروکارآتا نیام اٹ مذہبی ہم آہنگی نا مون آ دننگ آ زور شاغسا پارے کہ ہولی سی (ویٹیکن سٹی ) پاکستان اٹ ہندی چرچ آتون کمک خواہک ۔
