اسلام آباد۔ 18 نومبر (اے پی پی) سینیٹ اٹی قائد ایوان سینیٹر ڈاکٹر شہزاد وسیم پارینے کہ پاکستان ڈیہہ ٹی امن و شونداری کن کوشست کننگ ءِ دا بابت تینا مثبت کڑد ءِ ادا کرسا کیک، جی ایس پی پلس نا چرجوئی ٹی اٹلی نا مخ تفی نا ستاءِ کینہ، اٹلی نا زرکارآک پاکستان اٹ زرکاری آن فائدہ ہرفنگ کیرہ، اٹلی ٹی رہینگوک آ پاکستانیک ہڑتوم آ ملک آتا شونداری و شونہالی ٹی پبی کڑد ادا کننگ ءُ۔ داخیال آتا درشانی ءِ او اٹلی نا سفیر آندریاس فیراریس تون گپ وتران کرسا کرے ہرا پنچ شنبے نادے آ داڑے اونا ہنکین آ اوڑتون اوڑدہی کرے۔ اوڑدہی ٹی تین پہ تینی است خواہی نا امور آ سرجم گپ وتران کننگا وخت اس کہ ہڑتوم آ ملک آتا نیام اٹ پارلیمانی کمک و ادارہ جاتی کمکاری آ زور شاغنگا۔ اٹلی نا سفیر قائد ایوان ءِ اٹلی نا سیاسی سرکڑدہ و پارلیمان نا کنڈآن نیک است خواہی تا کلہو ءِ سرکرے۔ سینیٹ اٹ قائد ایوان سینیٹر ڈاکٹر شہزاد وسیم پارے کہ پاکستان اٹلی تون ہڑتوم آ کنڈآتا تعلقداری، واپار و زرگزرانی رابطہ غاتے پین مون آ دننگ نا خواہندار ءِ، پارلیمانی و واپاری ڈل آتا ہن و بر اٹ ترندی اتنگ آن السی کہول آ رابطہ غاتے سوگوی ملک، پارلیمانی سفارتکاری نا کمک اٹ ویل آتا ایسر اٹ کمک رسینگک۔ اوپارے کہ پارلیمنٹ نا اسیجائی دیوان اسہ تاریخی ءُ دیوان اس ئس، اسیجائی دیوان اٹ تاریخ ساز کانود سازی کننگا۔ اوپارے کہ وونٹ انا حق انا پیشن نا ملک پاکستانی تا متکن آ خواست پورو مس، مچ آ دنیا ٹی چندی ملک آتے ٹی رہینگوک پاکستانی تیٹی خوشی اس تالان مس، پیشن نا ملک رہینگوک پاکستانیک وزیراعظم عمران خان نا منت واری ءِ ہرفنگ ءُ۔ اوپارے کہ اسہ لکھ پنجا ہزار پاکستانی اٹلی ٹی رہینگ انگ ءُ، اٹلی ٹی رہینگوک آ پاکستانیک اٹلی و پاکستان ہڑتوم آتا شونداری و شونہالی ٹی پبی کڑد ادا کننگ ءُ، اٹلی ٹی رہینگوک پاکستانیک 600 ملین ڈالرز نا زرمبادلہ پاکستان آ گدریفنگ ءُ۔ قائد ایوان جی ایس پی پلس نا چرجوئی ٹی اٹلی نا کنڈآن تروک آ مخ تفی نا منت واری ءِ ہرفے و پارے کہ تین پہ تینی واپار نا کچ ءِ پین ودفنگ نا گرج ءِ، ہڑتوم آ ملک آتا نیام اٹ چندی بشخ آتے ٹی واپار و زرکاری کن بھلو وارخواہی اس ارے۔ اوپارے کہ اٹلی نا زرکارآک پاکستان اٹ زرکاری آن فائدہ ہرفنگ کیرہ، اٹلی ءِ یورپی ملک آتے ٹی نمان ہند اس دوئی ءِ، پاکستان اٹ زرکاری نا بھلووارخواہی اس ارے اوفتیان پبی فائدہ ہرفنگک۔ اطالوی سفیر اوغانستان آن درملکی تا پیش تمنگ و انسانی بنداو تیا تروک آ امداد آ امن و ایمنی نا بابت حکومت پاکستان نا کڑد انا ستاءِ کرے۔ ڈاکٹر شہزاد وسیم پارے کہ پاکستان ڈیہہ ٹی امن و شونداری کن کوشست کننگ ءِ و امن کن تینا مثبت کڑد ءِ ادا کرسا کیک۔ سینیٹر ڈاکٹر شہزاد وسیم ماحولیات نا بابت وزیراعظم عمران خان نا کوشست آتا ذکر ءِ کرسا پارے کہ حکومت پاکستان چاگڑد دوست پالیسی تے جہانی کہول آ پذیرائی دوئی مس۔ اطالوی سفیر پارے کہ اٹلی ٹی رہینگوک پاکستانی کمیونٹی اٹلی نا شونداری ٹی مثبت کڑد ادا کننگ ءُ، پاکستانی کمیونٹی ہڑتوم آ ملک آتا نیام اٹ پول انا کڑد ءِ ادا کننگءُ۔
