باوہ پیرہ ئی آ علاقہ غان مسترد مروک بندغ تون بیدس دھاندلی نا بہانہ غان پین ہچ اس اف، ڈاکٹر شہبازگِل نا مسکوہی وزیراعظم شاہد خاقان عباسی نا بیان آر دعمل

اسلام آباد۔ 18 نومبر (اے پی پی) وزیراعظم نا ترجمان و خصوصی کمکار سیاسی ابلاغ ڈاکٹر شہباز گل پارینے کہ مسکوہی وزیراعظم شاہد خاقان عباسی نا گچین کاری نظام آ تنقید شرمندگی نا سوب ءِ، نابود لیگی درباری مستین اٹ تینٹ گچین کاری دُزی کننگ نا کمک اٹ اقتداراٹ برسا کرے، وونٹ ءِ شرف ایتبو نا نعرہ اصل اٹ’شریف ءِ ااقتدار ایتبو‘ نا نعرہ ئس۔ پنچ شنبے نادے آ شاہد خاقان عباسی نا بیان آ ردعمل اٹ ڈاکٹر شہباز گل پارے کہ مسکوہی وزیراعظم نا گچین کاری نظام آ تنقید شرمندگی نا سوب ءِ۔ باوہ پیرہ ئی آ علاقہ غان مسترد مروک بندغ تون بیدس دھاندلی نا بہانہ غان پین ہچ اس اف۔ اوپارے کہ دھاندلی نا پروردہ شفافیت آن خارزدہ ءُ۔ نابود لیگی درباری مستین اٹ گچین کاری دُزی کننگ نا کمک اٹ اقتدار اٹ برسا کرے، او اینو الس نا مون آ بے نقاب مسنو۔ اوپارے کہ سمندرپار پاکستانی تتون قول غٹ کریر ولے اوفتے تون وونٹ انا حق انا قول بیرہ عمران خان وفاکرے۔ الیکٹرانک ووٹنگ مشین الس نا وونٹ انا محافظ مریک۔ شہباز گل پارے کہ الس ہراسٹ ءِ وونٹ ایتے بیرہ ہمو ایوان اٹ بننگ کیک۔ وونٹ ءِ شرف ایتبو نا نعرہ اصل اٹ ’شریف ءِ اقتدار ایتبو‘ نا نعرہ ئس۔ اوپارے کہ 90 نا دہائی و چھانگامانگانا سیاست دفن مسنے۔