اسلام آباد۔ 18 نومبر (اے پی پی) پاکستان بھارت نا غیرکانودی کوزہ گیری ٹی جموں و کشمیر نا علاقہ کولگام اٹی بھارتی کوزہ گیر فوج انا پین پنچ کشمیری تا عدالت آن ایڑتر خون نا ترندی اٹ مذمت ءِ کرینے۔ بھارتی کوزہ گیر فوج یکم اکتوبر آن داتم اسکان جعلی مقابلہ یا پن انا ’’سرچ آپریشن‘‘ تیٹی کم از کم 30 کشمیری ءِ شہید کرینے۔ پنچ شنبے نادے آ ترجمان دفترخارجہ پارے کہ مقبوضہ کشمیر اٹی بھارتی کوزہ گیر فوج انا بے گناہ کشمیری تا عدالت آن ایڑتر خون نا چرجوئی بے شرمی اٹ برجاءِ۔ دا’’ہندوتوا‘‘ آن زہمی انتہاپسند بی جے پی۔ آرایس ایس گٹھ جوڑ نا کمک اٹ کروک آ ناقابل بیان تشدد ءِ بے نقاب کیک ہرا مقبوضہ دامان ءِ اسہ آتش فشاں اسے ٹی بدل کرینے ہراڑے پروفیشنلز، زالبول، چناو بزرگ آتون اوار اسٹ اس ہم، داتسکان کہ کودک شاریک ہم کوزہ گیر فوج انا ریاستی دہشت گردی آن رکھوک افس۔ ترجمان پارے کہ بھارتی کوزہ گیر فوج انا کنڈآن چندی واقعہ غاتے ٹی شہید کشمیری تا لاش آتے اوفتا خاہوت آتا دوٹی تفننگ نا غیر انسانی و ظالمانہ عمل ہم مذمت نا قابل ءِ۔ کشمیری خاہوت ءِ شہید آتا مناسب جہہ جاگہ کننگ نا حق آن محروم کرسا اوفتا بنداوی حق ءِ خلنگ ساڑی بھارتی حکومت نا اخلاقی خواتہ پن ءِ پین بے نقاب کیک۔ بھارتی کوزہ گیر فوج کشمیری شاری تا زوال ہموناقابل تردید راستکی تے ہم پک کیک ہرا پاکستان نا کنڈآن ساڑی ٹی اسہ جامع ڈوزیئر اسے ٹی فراوان کننگانے۔ پاکستان جہانی برادری آن خواست کرینے کہ او مقبوضہ جموںو کشمیر اٹی بھارتی ریاستی دہشت گردی نا دمدستی نوٹس ءِ ہلے و کودک کشمیری تا انسانی حق انا سنگین خلاف ورزی تیکن بھارت ءِ جوابدہ گوندے۔ پاکستان جہانی برادری آہم زور شاغانے کہ او ڈیہہ ٹی پائیدار امن و سوگوی کن کشمیری الس نا است خواہی و اقوام متحدہ نا سلامتی کونسل نا تعلقدار قرارداد آتا رداٹ جموںو کشمیر تنازعہ نا منصفانہ و پرامن ایسری کن تینا کڑد ءِ ادا کے۔
